Валентины баяраар дунджаар 220,000 хүн гэрлэх санал тавидаг

Гэгээн хайрын Валентины баяр өнөөдөр /2025.02.14/ тохиож байна. Энэхүү дурлалт хосуудын баярыг Өмнөд Европт 13 дугаар зуунаас хойш тэмдэглэн иржээ.

Манай эриний III зуунд Ромын эзэн хаан Клавдий хүмүүсийг гэр бүл болохыг хориглосон хууль гаргажээ. Эзэн хааны энэ хуулийг залуу лам Валентин хүлээн зөвшөөрөөгүйн улмаас залуу гэр бүлүүдийг нууцаар гэрлүүлдэг байв. Түүнийг хүмүүст нууцаар тусалж байгааг нь мэдсэн Клавдий хаан ихэд хилэгнэж Валентиныг шоронд хатааж, дараа нь цаазаар авах зарлиг буулгажээ.

Харин Валентин шоронд хоригдож байхдаа шоронгийн захирагчийн охинтой танилцаж, хайр сэтгэлийн холбоотой болсон байна. Тэрээр цаазаар авхуулахынхаа өмнөхөн  хайртай бүсгүйдээ өөрийн хайр сэтгэлээ илэрхийлж, тэнгэрийн орноос ч түүнийгээ хайрлаж явах болно гэсэн утга бүхий зурвас бичжээ.

Түүнийг цаазалсан өдөр нь хүмүүсийн сэтгэлийг ихэд хөдөлгөж, оюун санаанд нь үүрд хадагдан үлдсэн нь өнөөгийн бидний тэмдэглэдэг хоёрдугаар сарын 14-ний өдөр юм. Энэ өдрийг залуу хосууд өөрсдийн хайр сэтгэлийн илэрхийллийн өдөр болгожээ. Сүм хийдүүд Валентиныг гэгээнтнүүдийн тоонд оруулснаар Гэгээн Валентины өдөр хэмээн нэрлэгдэх болсон байна.

Харин манай улсын хувьд Гэгээн хайрын баярыг 1990-ээд оны сүүлээр тэмдэглэж эхэлсэн бөгөөд хайр сэтгэлээ илэрхийлэх хамгийн нандин бэлгийг хосууд бие биедээ бэлэглэж, дурсамж дүүрэн өнгөрүүлдэг билээ.

 

 Сонирхолтой баримтууд

• АНУ-ын баярын ил захидал, мэндчилгээний холбооныхны судалгаагаар ил захидал, мэндчилгээний борлуулалтаараа Гэгээн Валентины баяр нь зул сарын баярын дараах байрыг эзэлдэг байна.
• XIX зуунд Валентины баярын ил захидал илгээх нь Англи улсад моод болсон байлаа. 1847 онд Эстер Хоуланд гэртээ өөрийн гар хийцийн ил захидлыг британи загвараар хийж Вустер, Массачусетс мужид салбараа нээн нэлээд амжилтад хүрчээ. XIX зуунаас эхлэн гар хийцийн ил захидлууд байр сууриа алдаж, үйлдвэрийн аргаар хийх нь олширсон байна. Ийнхүү ил захидлын үйлдвэрлэл XIX зуунаас эхлэн АНУ-д хүчээ авснаар тус улсын баяр худалдаа үйлдвэрлэлийн шинжийг тодорхойлж эхлэв. Энэ баяр нь эмэгтэйчүүд эрэгтэй хүнд шоколад бэлэглэх баяр юм.
• Жилд дунджаар 220,000 хүн Валентины баяраар хайртдаа гэрлэх санал тавидаг байна. Лэйди Гага, Кристина Агиллера, Салма Хайк, Адриана Лима, Мег Раян зэрэг алдартай, үзэсгэлэнтэй бүсгүйчүүд Валентины өдөр сүй тавих, гэрлэх санал авч байжээ.
• Валентины баярын уламжлалт бэлэг гэхэд болох зүрхэн шоколадыг анх Ричард Кардбөри гэгч шоколадны үйлдвэрийн эзэн 1868 онд Валентины баяраар эхнэртээ өөрийн гараар урласан зүрхэн хэлбэртэй хайрцганд шоколад хийн бэлэглэснээс үүдэлтэй аж. Мөн 1800-д оны үед эмч нар хайр дурлалаас болж шаналсан өвчтнүүдээ тайвшруулахын тулд шоколад идүүлдэг байжээ.
• Финляндад хоёрдугаар сарын 14-ийг “Найзуудын өдөр” болгосон бөгөөд романтик бэлэг, лааны гэрэл дэх оройн зоог, хайрын үгтэй захидал хүлээж суухын оронд найз нөхөдтэйгээ хамт хөгжилддөг аж.
• Арабын Нэгдсэн Эмират улсын Абу Даби хотод байдаг таван одтой Шангри Ла зочид буудлаас Валентины өдөрт зориулсан багц үйлчилгээг санал болгодог байна. Уг үйлчилгээ нь таныг лимузин машинаар тосон авч маш тансаг чимэглэл бүхий Ерөнхийлөгчийн өрөөнд хүргэж өгөхөөс эхэлнэ. Түүнчлэн тансаг оргилуун дарс, шоколадаар дайлж, хамгийн үнэтэй бүтээгдэхүүн бүхий алжаал тайлах салонд орж, дараа нь дээвэр дээр долоон хэсгээс бүрдсэн оройн зоог барих аж.  

Зоогонд түрс, хясаа болон амтат Франц хоол, хамгийн сайн чанарын дарс зэрэг багтсан байна. Мөн зөвхөн танд зориулсан илбэчин, хөгжимчид бий. Хоолны дараа үнэтэй брэндийн дэлгүүрээс авсан тансаг бэлгээ солилцож, эцэст нь нисдэг тэргээр Абу Даби хотын шөнийн тэнгэрээр зугаалах аж.

 

Энэ гайхалтай үйлчилгээг авахын тулд та оффшор бүст нуусан мөнгөнөөсөө 88,000 гаруй евро авахад л болох юм.

Б.Сарнай