Түргэний машин автобустай мөргөлдөж, эмч, жолооч нарын 6 хүн нас баржээ

Түргэний жолооч, эмч, өвчтөний хамт нас барсан гэх харамсалтай мэдээлэл цахим орчинд гараад байна. 

Энэ талаар цагдаагийн байгууллагаас тодруулахад дараах мэдээллийг өглөө.

Цагдаагийн байгууллагад энэ оны гуравдугаар сарын 11-ний өдөр 19 цагийн орчим Төв аймаг Өндөрширээт сум “Талын-Уул гэх газарт автомашинууд мөргөлдөж, хүн нас барсан байна” гэсэн мэдээлэл бүртгэгджээ.

Урьдчилсан байдлаар Төв аймгийн Өндөрширээт сумын нутаг дэвсгэрт байх Талын уул гэх газар буюу Улаанбаатар-Арвайхээр чиглэлийн авто замын 170 дахь км-н ойролцоо Toyota Hiace маркийн автомашины жолооч Э нь жолоодож яваад Улаанбаатар хотоос Завхан аймгийн чиглэлд зорчиж явсан Kia Grandbird маркийн том оврын автобустай мөргөлдөж, Toyota Hiace маркийн автомашинд зорчиж явсан 5 хүн, жолоочийн хамт нийт 6 хүн нас барж, 2 хүүхэд гэмтсэн ослыг Төв аймгийн цагдаагийн газар шалгаж байна.