Автобусны жолооч хаалгаа нээлгүй зогсож байгаад алдагдсан утсыг олж өгчээ

Нийтийн тээврийн автобусны үйлчилгээтэй холбоотой санал, хүсэлт, гомдлыг 7004-4040 дугаарын утсаар авч, шийдвэрлэдэг. Ингэснээр жолооч, зорчигчдын гаргаж буй үйлдэл олны анхааралд өртөж, засаж залруулах нь ч ил болсон. Дээрх дугаарт гуравдугаар сарын 14-17-ны хооронд автобусны үйлчилгээтэй холбоотой 10 гомдол, нэг талархал ирсэн байна.

Үүнээс нэгэн жишээг дурдахад, Ч:57 "Улаанчулуут-МУИС" чиглэлийн автобуст хоёр хүн утсаа алдсанаа мэдэгдэхэд жолооч хаалгаа онгойлгохгүй зогсож байгаад өөрийн утсаар залгаж олж өгчээ.

Харин гомдлын дийлэнх нь жолооч автобусны буудлаас хүнээ авахгүй явсан гэсэн бол зорчигчоос бэлэн мөнгө авсан, ёс бус харьцсан, жолооны ард утсаар ярьсан, гүйцэд суугаагүй байхад хөдөлж унагаасан зэрэг бүх гомдлыг шалгаж, зөрчил гаргасан жолоочийг торгосон байна.