АҮЭБЯ: ОХУ-ын шатахууны хориг манай улсад хамаарахгүй

ОХУ-ын Засгийн газраас өчигдөр буюу долоодугаар сарын 28-ны өдөр тогтоол гарган автобензины экспортыг наймдугаар сарын 31-ний өдрийг дуустал хугацаанд хязгаарлах шийдвэр гаргасан. 

Тэгвэл энэхүү шийдвэртэй холбогдуулан Аж үйлдвэр, эрдэс баялгийн яамнаас мэдээлэл өглөө.

Мэдээлэлд "ОХУ-д зуны урт амралт, аялал жуулчлалын өсөлт, газрын тос боловсруулах үйлдвэрүүдэд дулааны улиралд хийгддэг засварын ажлуудын удаашрал зэрэгтэй холбоотой дотоодын зах зээл дээрх шатахууны үнэ 30 орчим хувиар нэмэгдсэн байна. Үүнтэй холбоотой автобензинийн экспортод хориг тавих арга хэмжээ авах болсон талаар ОХУ-ын Засгийн газраас 2025 оны долоодугаар сарын 28-ны өдөр мэдээллээ. Уг хориг нь 2025 оны наймдугаар сарын 1-31-нийг хүртэл хэрэгжүүлэх, зөвхөн автобензинийн экспортыг хориглох, ОХУ-тай газрын тосны бүтээгдэхүүний худалдах, худалдан авах Засгийн газар хоорондын хэлэлцээртэй болон ЕвроАзийн эдийн засгийн гишүүн орнуудад үйлчлэхгүй байх заалттай байна. Манай улсад ОХУ-ын Ерөнхийлөгч В.В.Путины 2024 оны 9 дүгээр сард хийсэн албан айлчлалын үеэр “Монгол Улсад газрын тосны бүтээгдэхүүн нийлүүлэх салбарт хамтран ажиллах тухай” Монгол Улс болон Оросын Холбооны Улсын Засгийн газар хоорондын хэлэлцээрийг байгуулсан бөгөөд уг хэлэлцээрийн дагуу манай улсад түлш, шатахууныг тогтмол тасралтгүй худалдах, худалдан авах үүргийг талууд хүлээсэн байдаг. Нөгөө талаас манай улсын автобензинийн хэрэглээний 75 орчим хувийг ОХУ-ын Роснефть компани дангаар нийлүүлдэг импортлогч компаниудтай урт хугацааны гэрээтэй ажиллаж байна. Газрын тосны бүтээгдэхүүн, түлш шатахууны импортын үйл ажиллагаа хэвийн үргэлжилж байна. 2025 оны долоодугаар сарын 29-ний байдлаар улсын хэмжээнд Аи-92 автобензин 20 хоног, Аи-95 автобензин 41 хоног, дизель түлш 20 хоног, ТС-1 онгоцны түлш 46 хоногийн ердийн хэрэглээний нөөцтэй байна" гэв.   

А.НОМИН