Трамп Украиныг НАТО-д элсэхийг эсэргүүцжээ

АНУ-ын Ерөнхийлөгч Дональд Трамп, Украины Ерөнхийлөгч Владимир Зеленский нар Вашингтонд, Цагаан ордны Оваль өрөөнд уулзаж, Орос-Украины дайн болон Украины ирээдүйн талаар өргөн хүрээтэй ярилцлаа.

Уулзалтад Европын зарим удирдагчид ч оролцож, Украины төлөө цаашид дэмжлэг үзүүлэхээ илэрхийлсэн байна. Хэлэлцээний үеэр Трамп Украиныг НАТО-д элсэхийг эсэргүүцэж, Крымыг буцааж авах оролдлогоос татгалзахыг санал болгожээ. Үүний оронд тэрээр Европын холбоотой хамтран Украины аюулгүй байдлыг баталгаажуулах шинэ тогтолцоо бий болгох санаачилга дэвшүүлсэн байна. Түүнчлэн гурван талт уулзалт (АНУ, Украин, Орос)-ыг зохион байгуулах боломжийн талаар санал тавьжээ. Зеленский уулзалтын дараа Трамптай ярилцсандаа талархал илэрхийлж, хэлэлцээ өмнөхөөсөө илүү эерэг уур амьсгалтай болж өнгөрснийг онцлов. Европын удирдагчид ч Украиныг дэмжих байр сууриа илэрхийлсэн хэдий ч Трампын Крым болон НАТО-д элсэх асуудлаарх байр суурийг анхааралтай ажиглаж буйгаа нуусангүй. Ийнхүү уулзалт харьцангуй эв найртай, дипломат өнгө аястай болсон ч Украины тусгаар тогтнол, газар нутгийн бүрэн бүтэн байдалтай холбоотой асуудлууд дээр маргаантай байр суурь үлдсэн хэвээр байна.