“Бадарчин явсан газар балагтай”, Б.Бямбадорж явсан газар бүр ч балагтай

-Я.Содбаатар дарга нэр нүүрийг нь байнга хөөдөх Б.Бямбадоржоо хаяач ээ-

 

Ихэс дээдэс дундаа “үзэж” зэрэг огцорсон ч төрийн тогтворгүй байдал үргэлжилсээр байх бололтой. Тиймээс “Дээдэх нь суудлаа олохгүй бол доодох нь гүйдлээ олохгүй” гэдэг шиг төрийн бага, дунд шатанд ч “үзэж” ажил алба гацааж байна. “Сохор нохой дүйвээнээр” ч гэж үг бий. Үүн лугаа нийслэлийн Эрүүл мэндийн газарт үймээн дэгджээ. Учир нь нэг, хоёрдугаар эмнэлгийн дарга, Эрүүл мэндийн яамны Төрийн нарийн бичгийн дарга, Сайдын зөвлөх, нийслэлийн Эрүүл мэндийн газрын дарга зэрэг олон албан тушаалд байгууллагыг самарч ирсэн Б.Бямбадорж МАН-ын Генсек Я.Содбаатарын дэмжлэгээр Түр орлон гүйцэтгэгчээр ирснээр үймээн дэгдсэн байна.

 

Б.Бямбадорж Эрүүл мэндийн газрыг дахин самарчихлаа

 

Б.Бямбадорж тус газрын даргын үүргийг Түр орлон гүйцэтгэгчээр долоодугаар сард ирсэн цагаас хойш ажил нь жигд явж байсан айлын эмх цэгц алдагджээ. Тиймээс Хотын дарга Х.Нямбаатар хэдийгээр намынхаа том даргын шахаас захиас ч гэлээ түүнийг ажлаас нь чөлөөлж, Д.Сайнхүүг томилсон байна. Харин Д.Сайнхүү нь томилогдсон даруйд Эмнэлгийн тусламжийн хэлтсийн дарга Б.Батцоожийг сонгон шалгаруултад оруулахгүй хэмээн ажлаас нь халжээ. Хотын дарга Х.Нямбаатар үдээс хойш дахин захирамж гарган, Б.Батцоожийг Эрүүл мэндийн газрын даргын үүрэг гүйцэтгэгчээр томилж, Тамгын газраас ажил хүлээлцэхээр ирэхэд Б.Бямбадорж нь “Би эргэж ирнэ” гээд өрөөгөө лацдаад ор сураггүй болсон бол Д.Сайнхүү нь байгууллагын тамга аваад зугтжээ. Үүнээс үүдэн тус газрын ажилчин, алба хаагчид цалин цавгаа авч чадахгүй, зээл хуй нь нэхэгдсэн, бүхий л ажил гацсан байдалтай байгааг нийгэм даяар шуугисан даа. Хотын дарга захирамж гаргаад халж байхад эргэж ирнэ гээд албаны өрөө лацдаад явдаг эрх дураараа нөхрийн хувьд албан тушаалд очиж, идэж ууж сурсан учраас улайрч байгаа хэрэг. Тэр энэ айлыг ахиад самрахаар өрөө лацдаад алга болж л дээ.

 

Сонгон шалгаруулалтад тэнцэхгүй учраас хор хутгаж явна

 

Одоо Төрийн албан зөвлөлөөс нийслэлийн Эрүүл мэндийн газрын даргын сонгон шалгаруулалт зарлачихсан байна. Үүнд Б.Бямбадорж болон залуусын нэрс очсон дуулдана. Тэр энэхүү сонгон шалгаруулалтад тэнцэхгүй гэдгээ мэдэж байгаа учраас залуусыг замаасаа холдуулах, хор найруулахаар зэхэж суугааг ч эх сурвалж хэлж байна. Төрийн албаны зөвлөл хавиар ч найр тавин захиас илгээж, татаж түлхдэг дарга нараараа яриулж байгааг дуулгана лээ. Тиймээс Төрийн албаны зөвлөл энэ тал дээр шударга ажиллах эсэхийг хаа хаанаа анхааралтай ажиглаж байгаад ач холбогдол өгнө биз ээ. Тэрбээр цар тахлын үед тус газрын даргаар томилогдохдоо сонгон шалгаруулалтгүй томилогдож байв. Ингээд Төрийн албан зөвлөлд ажлын байран дээр сонгон шалгаруулалт явуулах гэхээр янз бүрийн аргаар хойшлуулж, сүүлдээ Хотын даргаар ажиллаж байсан Д.Сумъяабазартай үгсэн хуйвалдаж хойшлуулж байсныг ч дурдаж байсан. Одоо ч энэ аргаа хэрэглэж явна.

 

Я.Содбаатарын нэрийг мөн ч олон удаа шороотой хутгасан даа

 

Б.Бямбадорж гэх Анагаахын сургууль төгссөн нөхрийг нутаг нэгт Я.Содбаатар үеийн үед өөд нь татаж ирсэн ч тэр байнга нэр нүүрийг нь хөөдөж шороотой хутгаж ирсэн. Нэгдүгээр эмнэлгийн дарга болгосон чинь эмнэлгийнх нь ажил унаад хувийнх нь “Эрин” эмнэлэг цэцэглээд байдаг. Үүний зэрэгцээ тендер будилуулсан хэмээн түүний нэрийг хөөдсөн, тэгээд хөөгдсөн. Мөн хоёрдугаар эмнэлгийн даргаар ажиллахдаа богино хугацаанд эмнэлгийг нэг тэрбум төгрөгийн өрөнд оруулж, эмнэлгийн алба хаагч, эмч нарын хурлаар хөөгдөж, Эрүүл мэндийн яаманд хүртэл шаардах очсон учраас өөрөө өргөдлөө өгч зайлсан. Я.Содбаатар дарга арга буюу нутаг татан, ЭМЯ-ны Төрийн нарийн бичгийн даргаар хүртэл томилуулсан ч яамнаас зарласан тендерийг бусдад нэг тэрбум төгрөгөөр зарах гэж байгаад илчлэгдэх мэт будилаан хутгаад хөөгдсөн.

 

Цар тахлаар цадсан ч шунал нь барагдахгүй Б.Бямбадорж

 

Я.Содбаатар Ерөнхийлөгчийн Тамгын газрын даргаар ажиллаж байхдаа түүнийг нийслэлийн Эрүүл мэндийн газрын даргаар томилуулсан. Цар тахлын үе ч таарсан, мань эр ч зовлон дагуулаад зоолж өгсөн хүмүүсийн нэг. Б.Бямбадоржид шууд болон шууд бус утгаараа хамаарах хувийн эмнэлгүүд бий. Нэгдүгээр эмнэлгийн дарга байхдаа төсвөөс хумсалж босгосон “Эрин” эмнэлэг нь хожмоо “Шинонмед” нэртэй болсон. Эхнэрийнхээ эгч дүүсийн нэр дээр байгуулсан уг эмнэлэг 60-аад ортой ч 150 ортой хэмээн мэдүүлж “Оринтиал” зочид буудалд ор дэлгэн ковидын эмчилгээ хийж Эрүүл мэндийн даатгалын сангаас сар бүр 300, 400 саяар нь санхүүжилт авдаг байсныг нь илчилж байв. Ийнхүү хэдхэн сарын дотор Эрүүл мэндийн даатгалын сангаас нийтдээ гурван тэрбум 109 сая 570 мянга 698 төгрөг авчихсан.

 

“Хулгай” хийж, хууль зөрчсөн Б.Бямбадоржийг яагаад байн байн томилоод байдаг юм

 

Анхнаасаа л төсөв, тэр тусмаа эрүүл мэндийн салбараас хумсалж, хувьдаа завшиж ирсэн Б.Бямбадоржийг мэдсээр байж яагаад дахин дахин томилоод байдаг юм. Нутаг уснаас нь тодорсон Я.Содбаатар гэх татаастай байж болох ч нэр нүүрийг нь удаа дараа хөөдөөд байхад яагаад дахин дахин дэмжээд байдаг юм. Өөрийнх нь ажил албанд ч сөргөөр нөлөөлж байгааг мэддэг баймаар юм. Одоо Б.Бямбадоржийг хаяж, өөрийнхөө улс төрийн карьерыг бодох хэрэгтэй. Эрүүл мэндийн газрын даргад горилж, сонгон шалгаруулалт аргалах гэж байгаа Б.Бямбадоржийн булхай луйврын талаар та юу хэлэх вэ гээд эрүүл мэндийн салбарынхан дунд орвол хэдэн тэрэг ачаа цуглах биз. Тиймээс түүний булхай луйврыг дурдаад барахгүй учраас эргэн эрүүл мэндийн салбарын төлөөллүүдээс бодит жишээг газар дээрээс нь бодитоор харуулъя, бас сонсгоё.

 

 

Үргэлжлэл бий ...

 

Их Мэдэгч