Эрүүл мэндийн ажилтнуудын цалингаас 2 хувь татдаг Ч.Нарантуяа гэгч хэн бэ

Улс төрийн үймээнтэй зуузай холбон, багш нар цалингаа нэмэх шаардлагын дагуу ажил хаясан бол эмч эмнэлгийн ажилтнууд ч цалингаа нэмэхийг шаардсан. Иргэдийнхээ эрүүл мэндийн төлөө цаг наргүй зүтгэх эмч нар, Монгол Улсын ирээдүйг бэлдэж байгаа багш нарынхаа цалинг нэмэхийг нийгэм даяараа уухайлан дэмжиж байна.

 

Гэхдээ цалин нэмэх шаардлагыг Монголын эрүүл мэндийн ажилтны үйлдвэрчний эвлэлийн холбоо, Багш нарын үйлдвэрчний эвлэлийн холбоо гэх Төрийн бус байгууллагаас намрын халуухан улс төрийн үймээнтэй дөрөө харшуулан шаардсан нь хардлага төрүүлж буй. Улс төрд хардахаар ч олон үйл явдал өрнөсөн. Өдгөө ч үргэлжилж байна. 

 

Үйлдвэрчний эвлэлийн байгууллага чухам ямар чиглэлээр, ямар санхүүгээр, хэний эрх ашгийг хэрхэн хамгаалдаг байгууллага вэ гэх хардлага ч давхар төрнө. Гэтэл эрүүл мэндийн салбарын нийт цалингийн фонд нэг их наяд төгрөг байдаг бол тэд үүний хоёр хувийг авдаг аж. Тэгэхээр Монголын эрүүл мэндийн ажилтны үйлдвэрчний эвлэлийн холбоо жилд хоёр тэрбум төгрөгийг татаас хэлбэрээр авдаг гэсэн үг. Энэ бол асар их мөнгө. Ер нь ард иргэдийнхээ эрүүл энхийн төлөө өдөр шөнөгүй зүтгэж байгаа эмч, эмнэлгийн ажилтнуудын цалингаас нэг Төрийн бус байгууллага шууд хоёр хувь татаж байгаа нь ямар учиртай юм. Түүнийхээ төлөө юу хийдэг вэ. Яагаад тэдний цалингаас авчхаад тайлан тооцоо гаргаж, эргүүлэн тайлагнадаггүй юм гэх олон асуулт шил шилээ даран урсана.

 

Монголын эрүүл мэндийн ажилтны үйлдвэрчний эвлэлийн холбоо нь бодлогын түвшинд ямар хууль санаачилж, тэднийг дэмжив. Тэдний амьдрал ахуйд нэмэр болох ямар бодлогын түвшний ажил зохион байгуулав гэхээр бодитой зүйл алга. Гагцхүү эмч нараар бамбай хийн, талбай дээр цалин нэмэхийг шаардан зогсдог л байгууллага гэж хардахаар намтар түүхтэй юм. Улс төрийн ямар нэг халуун үйл явдал, аливаа шатны сонгууль болохоор идэвх нь сэргэж харагддаг гэдгийг ч хүмүүс хэлж байна.  Юутай ч Монголын эрүүл мэндийн ажилтны үйлдвэрчний эвлэлийн холбоо нь 2009 оны есдүгээр сарын 24-ний өдөр байгуулагдан, Бямбасүрэнгийн Мягмар даргаар нь ажиллаж, өдгөөгийн дарга Ч.Нарантуяа дэд даргаар ажиллаж байж.

 

Одоо үйлдвэрчний эвлэлээс шаардаж байгаа цалингийн доод хэмжээ нь 3.5 сая төгрөг. Энэ мөнгө төсөвт байхгүй учраас шат дараалалтай нэмнэ гэсэн засгийн байр суурийг хүлээн зөвшөөрөхгүй тэмцэж байгаагийн цаана ямар зорилго байна вэ.

 

Тэр ч бүү хэл Ч.Нарантуяа Эрүүл мэндийн сайд асан Т.Мөнхсайхан болон бусад Эрүүл мэндийн сайдын Зөвлөхөөр нь ажиллаж байсан. Энэ үед ч эмч, эмнэлгийн ажилтнууд цалингаа нэмүүлэхийг үе үе шаарддаг байсан. Харин сайдын Зөвлөх аргалаад өнгөрөөдөг байсныг санахад илүүдэх юун. Одоо чухам ямар зорилгоор ийн яваа зэргийг ч бодож үзэх ёстой. Тэрбээр саяхан Эрүүл мэндийн сайд Ж.Чинбүрэнгийн Зөвлөхөөр томилогдсон нь ямар учиртай юм. Урьд өмнөх үйл явдал, мэдээ мэдээллийг ч шүүн харахад гэмгүй. Тиймээс эмч, эмнэлгийн ажилтнуудаа Эрүүл мэндийн сайдын Зөвлөх гэх нэр хүндтэй албан тушаалын золиос болж байгаа юм биш биз.  

 

Ямартай ч эрүүл мэндийн салбарын ажилтнуудын цалингаас хоёр хувь татаж байдаг Ч.Нарантуяа гэгч хэн бэ. Түүний намтрыг нь сөхвөл Хөдөлмөр нийгмийн харилцааны дээд сургууль төгсөгчдийн холбоо НҮТББ, Мөнхийн шүтээн гурван булаг НҮТББ, Эрдэнэтийн бүсийн оношилгоо, эмчилгээний төвийн Үйлдвэрчний эвлэлийн хороо зэрэг байгууллагуудад 20 гаруй ажилласан байна. Харин Б.Мягмар нь тус байгууллагын даргаар ажиллаж, мөн л цалин нэмэхийг шахаж шаардан явсаар 2020 онд НИТХ-ын төлөөлөгчөөр сонгогдсон байна. Түүнтэй хамт мөр зэрэгцэн тэмцэж явсан зарим нэг хүмүүс эрүүл мэндийн салбартаа дарга даамал болсон гэж салбарын хүмүүс нь ярьж байна.

 

Мөн Өрхийн эмч нарын нийгэмлэг, Сумын эмч, мэргэжилтнүүдийн холбоо, Сүрьеэтэй тэмцэх нийгэмлэг, Глобал сан гэх зэрэг байгууллагуудын үйл ажиллагааг анзаарах л хэрэгтэй. Тэд чухам салбарынхаа төлөө юу хийдэг вэ.

 

Эцэст нь хэлэхэд эмч, эмнэлгийн ажилтнуудынхаа цалин хөлсөө нэмүүлэхийг дэмжиж байгаа. Гагцхүү энэ мэт хүмүүсийн улс төрийн золиос болох вий.

 

Үргэлжлэл бий...

 

  Их Мэдэгч