ЭМДС-тай холбогдуулан, Л.Төмөрбаатар тэргүүтэй эмнэлгийн эздийг шалга

Ханиад томууны дэгдэлт ихсэж, эмнэлгүүд ачааллаа дийлэхгүйн зэрэгцээ Эрүүл мэндийн даатгалын сан хоосорчихсон, эмнэлгүүдэд чухал эм тариа байхгүй учраас хэвтэн эмчлүүлэгчид гаднаас өөрсдөө эм тариагаа худалдан авч байна.

 

Урьд өмнө Эрүүл мэндийн даатгалын сан ашигтай ажилладаг байсан бол гүйцэтгэлээр санхүүждэг болсон цагаас хойш ийнхүү алдагдал хүлээсээр сүүлдээ уутныхаа амыг сэгсэрчихсэн, иргэд эм тариа худалдан авах мөнгөгүй бол амиа алдахад ч бэлэн болсон. Анх алдагдал хүлээж эхлэхэд нь улсын төсвөөс зузаатгал хийсэн нь энэ санг хойшид ч хоосроход толгойг нь илсэн зүйл байв. Чухам яагаад Эрүүл мэндийн даатгалын сан хоосров, хэнээс болж ёроолдоо тулав гэдгийг даруй шалган тогтоох ёстой. Эх сурвалжийн хэлснээр сангийн үйл ажиллагааг хуулийн байгууллагаас шалгаад эхэлсэн байна.

 

Ямартай ч энэ оны эхний есөн сарын байдлаар Эрүүл мэндийн даатгалын сангаас 202 хувийн эмнэлэг мөнгө авчээ. Үүнээс 160 орчим эмнэлэг нь 1.0 тэрбум төгрөгөөс доош санхүүжилт авдаг бол 40 орчим эмнэлэг нь 1.0 тэрбум төгрөгөөс дээш, дунджаар 4-10 тэрбум төгрөгийн санхүүжилт авчээ. Гэхдээ энд тодорхой цөөн тооны хувийн эмнэлгүүд ихээхэн хэмжээний мөнгө авдаг нь баримтаас харагдаж байна. Тухайлбал, “Бриллиант” эмнэлэг 2016 онд байгуулагдсан цагаасаа хойш мөнгө авч эхэлсэн ч 2023 онд огцом нэмэгдэж, 14 тэрбум төгрөг авсан байх жишээтэй. Мөн “Сондра” эмнэлэг 600 сая төгрөг авч байснаа огцом нэмэгдэн, дөрвөн тэрбум төгрөг авсан бол “Реха мед” эмнэлэг 2022 онд 838 сая төгрөг авч байгаад гурван жилийн дотор 14 дахин нэмэгдэж, 14 тэрбум төгрөг болсон гэх мэт зарим нэг нэр бүхий эмнэлэг дээр огцом мөнгөн дүн нэмэгдсэний цаана өнөөх л танил тал, ихэс дээдсийн дохио зангаа байдаг бололтой.

 

Өөр нэг эх сурвалжид дурдсанаар “Реха мед” эмнэлэг нь 2025 оны аравдугаар сарын 31-ны байдлаар Эрүүл мэндийн даатгалын сангаас 17.7 тэрбум төгрөгийн санхүүжилт авчээ” гэсэн мэдээлэл бий. Тэгвэл “Реха мед” эмнэлгийн Гүйцэтгэх захирлаар Лувсансамбуугийн Жамбасүрэн гэх Төрийн банкны дэд захирлаар ажиллаж байсан, хувьдаа “Траст капитал” хэмээх Банк бус санхүүгийн байгууллагатай нөхөр ажилладаг аж. Түүний төрсөн ах Лувсансамбуугийн Төмөрбаатар нь Хавдар судлалын үндэсний төвийн дарга, нийслэлийн Эрүүл мэндийн газрын даргаар тус тус ажиллаж байсан гэдгийг ч сануулахад илүүдэх юун. Энэ утгаараа салбартаа асар их нөлөөтэй, нийслэлийн Эрүүл мэндийн газрын даргаар ажиллах таван жилийн хугацаанд олон ч сайдын нүүр үзэж, аргыг нь олж ажилласан хүн гэдгийг ч мэднэ. Түүнчлэн Л.Төмөрбаатарын дүү Лувсансамбуугийн Бямбасүрэн нь Иргэний нисэхийн ерөнхий газрын даргаар ажиллаж байхдаа тендер будилуулсан, ихээхэн хэмжээний мөнгө хувьдаа завшсан, “Трасткапитал” Банк бус санхүүгийн байгууллагаараа дамжуулан мөнгө хүүлсэн гэх мэт хууль бус үйлдлийнх нь талаар хэвлэлүүд удаа дараа дэлгэж байсан юм. Ах дүүгээрээ Төрд алба хашчихаад хувийнхаа байгууллагаар мөнгө угааж байсан гэх мэдээлэл ч байдаг. Энэ утгаараа Эрүүл мэндийн даатгалын санг хоослоход Л.Төмөрбаатарын ах дүү нарын оролцоо чамгүй байж болох юм.  

 

Ийнхүү хувийн эмнэлгүүдийн санхүүжилт огцом, бүр зарим нь 14 дахин өссөн байхад улсын эмнэлгүүдийн санхүүжилт хоёр дахин ч өссөн зүйл байхгүй гэдгийг эх сурвалж хэлж байна. Тэгэхээр Эрүүл мэндийн даатгалын сан хоосорсон шалтгаан нь энэ мэт хувийн эмнэлгүүдийн санхүүжилттэй холбоотой байж таарна. Чухам хэн гээч нөхөр ямар замаар мөнгө яаж гаргаад байсныг хуулийн байгууллага шалгаж тогтоох байх.

 

Мөн нэг дутагдал байгаа нь Эрүүл мэндийн даатгалын сан эмнэлгүүдтэй гэрээ хийхдээ тоо, хэмжээ заадаггүй учраас цаадуул нь хамгийн үнэтэй эм тариа, үйлчилгээ үзүүлсэн хэмээн санхүүжилт нэхдэг аж. Тиймээс эхний ээлжид хувийн эмнэлэгтэй, түүгээрээ дамжуулан, хамгийн их мөнгийг Эрүүл мэндийн даатгалын сангаас авсан Л.Төмөрбаатар, түүний дүү нараас эхлэн шалгах ёстой.

Их Мэдэгч