Хонконг норовирусын онц байдал зарлалаа

Сүүлийн таван өдрийн дотор 16 тохиолдол бүртгэгдэж, 57 хүн халдвар авч, 5 хүн эмнэлэгт хэвтжээ.

Хонконгийн эрх баригчид Солонгосын компанийн нийлүүлдэг түүхий хясааны импорт, түгээлт, борлуулалтыг түр зогсоох алхам хийлээ. Энэхүү арга хэмжээ нь Хонконгт норовирусын халдвартай холбоотой хоолны хордлогын тохиолдол огцом нэмэгдсэнтэй холбоотой ажээ.

The Standard Hong Kong зэрэг орон нутгийн хэвлэл мэдээллийн хэрэгслүүд Хүнс, хүрээлэн буй орчны эрүүл ахуйн газрын (FEHD) харьяа Хүнсний аюулгүй байдлын төв (CFS) нь Солонгосын тодорхой компанийн нийлүүлдэг түүхий хясааны импорт, түгээлт, борлуулалтыг нэн даруй зогсоох тушаал гаргасан гэж мэдээллээ. 

CFS-ийн хэвлэлийн төлөөлөгч "Эрүүл мэндийн яаманд саяхан мэдээлэгдсэн хоолны хордлогын тохиолдлуудтай холбогдуулан ресторан, нийлүүлэгчдийг шалгасны дараа бид Солонгосын тодорхой компанийн нийлүүлдэг түүхий хясаатай холбоотой болохыг баталгаажуулсан. Урьдчилан сэргийлэх арга хэмжээ болгон бид тус компанийн бүтээгдэхүүнийг Хонконгт түгээхийг нэн даруй хаасан" гэж мэдэгдэв.

Хонконгийн эрх баригчид түүхий хясаа хэрэглэснээс үүдэлтэй хоолны хордлогын тохиолдол саяхан огцом нэмэгдсэний дараа тусгай арга хэмжээ, хяналт шалгалтыг чангатгаж байна. Өнгөрсөн сард Хонконгт долоо хоногт дунджаар дөрвөн тохиолдол бүртгэгдсэн нь өнгөрсөн оны арванхоёрдугаар сард гарсан долоо хоногийн дундаж нэг тохиолдлоос мэдэгдэхүйц өссөн үзүүлэлт юм. Зөвхөн энэ сарын эхний таван өдөрт л арван зургаан тохиолдол бүртгэгдсэн байна. 

Нийт 57 хүн халдвар авсан бөгөөд тэдний тав нь эмнэлэгт хүргэгдсэн байна. Тодруулбал, 28-38 насны нэг эрэгтэй, гурван эмэгтэй 1-р сарын 31, 2-р сарын 1-ний өдрүүдэд Шатины ойролцоох Нью Таун Плаза дахь ресторанд хооллож, 20-42 цагийн дараа хэвлийгээр өвдөх, дотор муухайрах, бөөлжих, суулгах, халуурах зэрэг шинж тэмдэг илэрсэн байна. Шинжилгээгээр норовирусын халдвар авсан нь батлагдсан бөгөөд тархвар судлалын судалгаагаар тэд Солонгосын компанийн нийлүүлсэн түүхий хясаа хэрэглэсэн болох нь тогтоогджээ.

Хясаанууд нь их хэмжээний далайн усыг шүүж, хоол хүнсээ авдаг организмууд юм. Тиймээс, хэрэв тэдгээрийг бохирдсон усанд үржүүлсэн эсвэл барьсан бол вирус, бактери хуримтлагдахад маш мэдрэмтгий байдаг. Ялангуяа норовирус нь бага температурт ч амьд үлдэж, бага хэмжээгээр ч халдвар үүсгэж болзошгүй тул өвлийн улиралд хоолны хордлогын дэгдэлтийн гол шалтгаан болдог аж. 24-48 цагийн хугацааны дараа бөөлжих, суулгах, хэвлийгээр өвдөх, халуурах зэрэг шинж тэмдэг илэрдэг байна.

Тиймээс ахмад настан, хүүхэд, суурь өвчтэй хүмүүс зэрэг дархлаа суларсан хүмүүс шингэн алдалт зэрэг хүндрэл гарах эрсдэл өндөр байдаг тул болгоомжтой байх шаардлагатай. CFS-ийн хэвлэлийн төлөөлөгч "Хясаанууд нь эмгэг төрүүлэгчдийг хуримтлуулах чадвартай. Жирэмсэн эмэгтэйчүүд, ахмад настан, дархлааны систем суларсан хүмүүс түүхий эсвэл дутуу болгосон хясаа хэрэглэхээс зайлсхийх хэрэгтэй" гэж онцолжээ.