Иран Ормузын хоолойг бүрэн хянаж байна

Иран Ормузын хоолой дахь усан тээврийн замыг хаах санаагаа дахин нотолж Ормузын хоолойд 10 гаруй газрын тос тээвэрлэгч хөлөг онгоц шатсан тухай мэдэгдэв.

Оросын РИА Новости мэдээллийн агентлаг болон бусад эх сурвалжийн мэдээлснээр, Ираны Хувьсгалт Гвардийн корпус "давтан анхааруулгыг үл тоомсорлосон тул 10 гаруй далайн тээврийн хөлөг онгоцууд пуужингийн дайралтад шатсан" бөгөөд Хувьсгалт Гвардийн корпус хоолойг бүрэн хяналтандаа авсан гэж мэдэгджээ.

АНУ-ын Тэнгисийн цэргийн хүчин газрын тос тээвэрлэгч хөлөг онгоцыг дагалдан явах боломжийг албан ёсоор баталгаажуулж, хатуу хариу арга хэмжээ авах дохио өгсний дараа Ерөнхийлөгч Дональд Трамп олон нийтийн мэдээллийн хэрэгслээр "АНУ-ын Тэнгисийн цэргийн хүчин Ормузын хоолойгоор газрын тос тээвэрлэгч хөлөг онгоцыг дагалдан явж эхэлнэ" гэж мэдэгдэж, мөн Персийн булангийн бүс нутагт эрчим хүчний тээвэрлэгч хөлөг онгоцонд даатгал, баталгаа өгөх төлөвлөгөөгөө гаргасанаа зарласан. Мөн газрын тос үйлдвэрлэгч орнууд өөрсдийн хариу арга хэмжээг авч эхэлжээ.

Ройтерс агентлагийн мэдээлснээр, Саудын Арабын төрийн өмчит газрын тосны компани Aramco түүхий газрын тосны экспортынхоо зарим хэсгийг Улаан тэнгисийн эрэг дээрх Янбу боомт руу шилжүүлэх төлөвлөгөөг хэрэгжүүлж байна.

Арабын Нэгдсэн Эмират улс мөн Оманы булангийн эрэг дагуух боомтуудтай холбогддог хоолойг ашиглан Ормузын хоолойг тойрч гарах талаар төлөвлөж байгаа аж.

Гэсэн хэдий ч өөр боомт, хоолойн бодит ачааллын хүчин чадал, аюулгүй байдал нь бэрхшээл учруулж байна. Учир нь улаан тэнгист Ираны гол төлөөлөгч гэгддэг Йемений Хусит босогчид худалдааны хөлөг онгоц болон газрын тосны тээвэрлэгч хөлөг онгоц руу нисгэгчгүй дрон болон пуужингийн дайралт хийж байна.