Uber АНУ-д эмэгтэй жолооч сонгох шинэ функцийг нэвтрүүлэв

АНУ-д үйл ажиллагаа явуулдаг такси дуудлагын компани Uber эмэгтэй зорчигчид болон жолооч нарын аюулгүй байдлыг нэмэгдүүлэх зорилгоор “Women Preference” буюу эмэгтэй жолооч сонгох шинэ функцийг улс даяар нэвтрүүлж эхэлжээ. Гэвч энэхүү функц нь эрэгтэй жолооч нарыг ялгаварлан гадуурхаж байна гэсэн маргааныг дагуулж байна. 

Тус функцийн хүрээнд эмэгтэй хэрэглэгчид аппликейшний “Эмэгтэй жолооч” гэсэн тохиргоог хийж эмэгтэй жолооч дуудах боломжтой юм. Хэрэв ойролцоо эмэгтэй жолооч байхгүй тохиолдолд хэрэглэгчид өөр такси сонгох боломжтой бөгөөд урьдчилан захиалга хийх үедээ ч эмэгтэй жолооч сонгож болно.

Үүнээс гадна эмэгтэй жолооч нар өөрсдөө эмэгтэй зорчигч авч явах тохиргоог идэвхжүүлэх боломжтой бөгөөд хүссэн үедээ уг сонголтыг унтрааж болно. Компанийн мэдээлснээр АНУ дахь Uber-ийн жолооч нарын ойролцоогоор 20 хувь нь эмэгтэйчүүд байдаг ч хот бүрт энэ үзүүлэлт харилцан адилгүй байна.

Гэвч Калифорни мужийн хоёр эрэгтэй жолооч Uber-ийн эсрэг хамтын нэхэмжлэл гаргаж, уг функц нь бизнесийн байгууллагуудын хүйсээр ялгаварлан гадуурхахыг хориглодог Калифорни мужийн Unruh Civil Rights Act хуулийг зөрчиж байна гэж мэдэгдсэн байна. Тэдний үзэж байгаагаар эмэгтэй жолоочид илүү олон зорчигч авах боломж олгож байгаа нь эрэгтэй жолооч нарыг ялгаварлан гадуурхаж буй хэрэг. Мөн уг бодлого нь “эрэгтэйчүүд эмэгтэйчүүдээс илүү аюултай” гэсэн хэвшмэл ойлголтыг төрүүлж байна гэв. 

Харин Uber компани шүүхэд гаргасан тайлбартаа шинэ функц нь ялгаварлан гадуурхалт биш, харин хэрэглэгчдийн аюулгүй байдлыг сайжруулах олон нийтийн ашиг сонирхолд нийцсэн арга хэмжээ гэж мэдэгдсэн байна. Тус компани жолооч нар аппликейшнд бүртгүүлэхдээ маргааныг арбитрын журмаар шийдвэрлүүлэх гэрээнд гарын үсэг зурдаг болохыг мөн онцолжээ.

Хүйсийн ялгаварлан гадуурхалт, бэлгийн дарамтын хэргээр мэргэшсэн McAllister Olivarius хуулийн фермийн хамтран үүсгэн байгуулагч Ann Olivarius энэ функц нь хууль зүйн маргаанд өртөх магадлалтай ч хэрэглэгчдийг хамгаалах бизнесийн бодит шаардлага гэж үзэж байгаагаа илэрхийлсэн байна.

Uber компани уг функцийг өнгөрсөн зун San Francisco, Los Angeles, Detroit хотуудад туршиж эхэлсэн бөгөөд дараа нь АНУ-ын 26 хотод өргөжүүлсэн байна. Энэхүү санаачилгыг анх 2019 онд Saudi Arabia улсад эмэгтэйчүүдэд жолоо барих эрх олгосны дараа нэвтрүүлж байсан бөгөөд одоо Canada, Mexico зэрэг нийт 40 гаруй оронд ижил төстэй боломжийг санал болгосон байна. 

 

 

Эх сурвалж: BBC