1 сая дагагчтай хуурамч хаягийг META хаажээ

Дональд Трамптай хамт гарч ирснээрээ олны анхаарлыг татсан "эмэгтэй цэрэг нөлөөлөгч" хиймэл оюун ухаан (AI)-аар бүтээгдсэн хуурамч хүн болох нь тогтоогджээ.

Үзэсгэлэнтэй шаргал үстэй бүсгүй АНУ-ын цэрэг Жессика Фостер Иранд хийсэн агаарын цохилтын эхний өдөр Ерөнхийлөгч Трамптай хамт нислэгийн зурвас дээр алхаж байгаа нь олны анхаарлыг татжээ. 

Түүний Инстаграм хаяг нь дөрвөн сарын дотор 1 сая гаруй дагагчтай болжээ. Энэхүү "хуурамч мөнгө олох стратеги" нь ирээдүйд мэдээллийн дайн болж хувирах вий гэж мэргэжилтнүүд санаа зовж байна. 

Тэд нэрээ нууцалсан хаягуудыг "бот арми" шиг суртал ухуулга эсвэл худал мэдээлэл түгээхэд ашиглаж болзошгүй гэж анхааруулж байна. TikTok, Instagram, X (өмнө нь Twitter байсан) зэрэг платформууд дээр Трампыг дэмжигч цэргүүд, ачааны машины жолооч, цагдаагийн ажилтнуудын дүрд хувиргасан хиймэл оюун ухаанаар бүтээгдсэн эмэгтэй хаягууд хурдацтай тархаж байгаа бөгөөд олон хэрэглэгчид тэднийг жинхэнэ хүмүүс гэж андуурдаг. 

BBC-ийн мэдээлснээр саяхан хиймэл оюун ухаанаар бүтээсэн олон зуун видео бичлэгүүд онлайнаар тархаж, Ираны эмэгтэй цэргүүд болон нисгэгчид цэргийнхнээ дэмжиж байгааг харуулж байсан. Гэсэн хэдий ч Иран эмэгтэйчүүдийг дайнд оролцохыг хориглодог тул энэ видеонууд нь хуурамч гэсэн сэжүүр болж байна. 

Жессика Фостер нь Мелания Трамп, Владимир Зеленский, Владимир Путин, Лионель Месси нартай уулзаж буй зургуудаа оруулсан нь түүнийг хуурамч болохыг илчилсэн байна. Гэсэн хэдий ч олон тооны хэрэглэгчид Фостерийн хаяг дээр сэтгэгдэл үлдээж, зарим нь түүний гадаад төрхийг магтаж, дэмжсэн мессеж илгээжээ. 

Мета-ийн зүгээс бодлогын зөрчлийн улмаас Инстаграм хаягийг устгасан гэж мэдэгджээ. АНУ-ын Цагаан ордон мөн тодорхой мэдэгдэл гаргаагүй байна. Бостоны Их Сургуулийн профессор Жоан Донован "Бид бодит байдал ба бодит бус байдлын хоорондох хил хязгаар улам бүр бүдгэрч буй нийгэм рүү чиглэж байна" гэж анхааруулжээ.