ҮХЦ: Ерөнхийлөгчийн бүрэн эрхийн хугацаа 4 жил байх заалтаар маргаан үүсгэлээ

Ерөнхийлөгчийн бүрэн эрхийн хугацаа 4 жил байх заалтаар Үндсэн хуулийн цэцэд маргаан үүсгэжээ. 

Тодруулбал, Үндсэн хуулийн цэцээс "Нэр бүхий иргэний мэдээллийн дагуу Монгол Улсын Ерөнхийлөгчийн тухай хуулийн 6 дугаар зүйлийн 1 дэх хэсэгт “Ерөнхийлөгчийн бүрэн эрхийн хугацаа Үндсэн хуулийн гучдугаар зүйлийн 2 дахь хэсэгт зааснаар 4 жил байна.” гэж заасан нь Монгол Улсын Үндсэн хуулийн Гучдугаар зүйлийн 2 дахь хэсгийн “Ерөнхийлөгчөөр тавин нас хүрсэн, сүүлийн таваас доошгүй жил эх орондоо байнга оршин суусан, Монгол Улсын уугуул иргэнийг зургаан жилийн хугацаагаар зөвхөн нэг удаа сонгоно.” гэж заасныг зөрчсөн эсэх асуудлаар Үндсэн хуулийн цэцэд маргаан хянан шийдвэрлэх ажиллагаа үүсгэн шалгаж байна" хэмээн мэдээлэв.

Сануулахад, 2019 оны Үндсэн хуулийн нэмэлт өөрчлөлтөөр Монгол Улсын Ерөнхийлөгч зургаан жилийн хугацаагаар нэг удаа сонгогддог болсон. Уг заалтыг хэрэгжүүлж буй анхны тохиолдол нь одоогийн Ерөнхийлөгч У.Хүрэлсүх юм. Түүний бүрэн эрхийн хугацаа 2027 онд дуусна.