МАН-ын Удирдах зөвлөл хуралдаж, сайд нар, УИХ-ын даргад нэр дэвшигчийг тодруулна

Монгол Улсын 35 дахь Ерөнхий сайдаар Н.Учрал томилогдсон ч Засгийн газраа хараахан бүрдүүлээгүй байгаа юм. Одоогоор зөвхөн ХҮН намд хамтран ажиллах саналаа хүргүүлж, үүнийг нь тус нам дэмжсэн. Харин ИЗНН, Үндэсний эвсэлд саналаа хүргүүлээгүй бол АН хамтрахгүй гэдгээ илэрхийлээд байна.

МАН-ын Удирдах зөвлөл үдээс өмнө хуралдаж, Засгийн газрын бүрэлдэхүүн болон УИХ-ын даргад нэр дэвшигчийг тодруулахаар болжээ. Улмаар шийдвэрээ УИХ дахь МАН-ын бүлэгт чиглэл болгох аж.

Хэрэв тодорхой шийдвэр гаргавал Засгийн газрын бүрэлдэхүүнээ Ерөнхий сайд Н.Учрал УИХ-ын чуулганы нэгдсэн хуралдаанд танилцуулна. Харин УИХ-ын даргыг санал хураалтаар томилох юм.