Гучин настай залуу долоон хүний алтан амь аварч, бурхан зүг одлоо

Таван настайдаа аавыгаа алдаж, дүү нараа хайрлан халамжилж байсан 30 настай залуу тархины цус алдалтын улмаас ухаан орж чадаагүй бөгөөд эрхтэн хандивлах замаар долоон хүнд шинэ амьдрал бэлэглэжээ.

Солонгосын Эрхтэн, Эдийн Хандивлах Агентлагийн 16-ны өдрийн мэдээлснээр, талийгаач О Сон Жэ энэ оны 2-р сарын 6-нд Чосун Их Сургуулийн эмнэлэгт зүрх, уушиг, элэг, хоёр бөөр, нүдээ хандивласан байна.

Тэрбээр энэ оны  1-р сарын 18-нд ресторанд гэнэтийн осолд орж ухаан алдсаны дараа тархины цус алдалттай гэж оношлогджээ. Мэс заслын дараа богино хугацаанд ухаан орж, ээждээ "Би тандаа хайртай" гэж хэлсэн боловч түүний бие дахин муудаж, эцэст нь өөд болжээ.

Талийгаач нь эргэн тойрныхоо хүмүүст хэрэв би өөд болвол эд, эрхтэнээ хандивлана хэмээн ярьдаг байжээ. Түүний ээж Чой Ра Юн хүүгийнхээ амьдралынхаа туршид өгсөн амлалтаа эргэн дурсаж, эрхтэн хандивлахаар шийджээ. "Зүгээр л нас барах нь утгагүй тул би эцсийн мөчид дахин нэг амийг аврах болно." Хүүгийн минь ядаж нэг хэсэг нь энэ дэлхийн хаа нэгтээ амьдарч, амьсгалаасай гэж маш их хүсэж байна гэжээ.

Солонгосын өмнөд Чолла мужийн Гуаньян хотод хоёр хүү, нэг охинтой айлын ууган хүү болж төрсөн О нь таван настайдаа аавыгаа алдаж, ганц бие ээжийнхээ асрамжинд өсчээ. Бага наснаасаа л ээжийгээ халамжилж, ажлаасаа ядарч гэртээ ирэхэд нь хоол хийж өгдөг, дүү нараа асарч халамжилдаг найдвартай хүү байв.

Ахлах сургуулиасаа эхлэн цагийн ажил хийж, хичээнгүй амьдралаар амьдарсан байна. Өнгөрсөн жил бүтэн цагийн ажилтан болж компанид орсны дараа О нь ээждээ "Одоо мөнгө олох л үлдлээ, санаа зовох хэрэггүй. Би дараа нь танд заавал байшин авч өгнө" гэж хэлдэг үнэнч хүү байв. 

Тэрбээр нээлттэй зан чанартай, олон найз нөхөдтэй байжээ. Бага сургуулиасаа хойш үерхсэн найз болох Ви Сон Жүн нь “Бидний найз нөхдийн уур амьсгалыг үргэлж тэргүүлдэг байсан найзын минь үлдээсэн хоосон орон зай асар их” гэв. 

Тэрбээр “Тэр эрхтэн хандивлах тал дээр үргэлж эерэг хандлагатай байсан тул диваажинд ч гэсэн эрхтэнээ хандивлахдаа бахархаж, баярлах байсан байх гэж би бодож байна” гэжээ.

Эрхтэн хандивлах төвтэй хийсэн видео ярилцлагадаа түүний ээж хатагтай Чой хүүгийнхээ тухай бодож уйлж, “Сон Жэ, би чамайг маш их санаж байна. Өөр юу ч хүсэхгүй байна. Надад зүгээр л чи хэрэгтэй байна. Гуйя, ээжийнхээ дэргэд буцаж ирээрэй. Чи миний хүү болж буцаж ирээсэй гэж хүсэж байна” гэжээ.

Түүний найз Ви Сон Жүн “Чамайг диваажинд гайхалтай сайхан амьдарч байгаасай гэж хүсэж байна. Дахин уулзах хүртлээ би үлдсэн гэр бүлийн гишүүдийг чинь сайн халамжлах болно” гэж амлав.