IU төрсөн өдрөөрөө Сөүлийн "Асан эмнэлэг" болон эмзэг бүлгийн иргэдэд 300 сая вон хандивлажээ

Өмнөд Солонгосын дуучин, жүжигчин IU төрсөн өдрөө тохиолдуулан нийт 300 сая вон (ойролцоогоор 200,160 ам.доллар) хандивласан талаар түүний агентлаг Edam Entertainment мэдээллээ.

Хандивыг уран бүтээлч болон түүний албан ёсны фен клуб болох “Uaena”-гийн нэрийг нэгтгэсэн “IUaena” нэрийн дор хийжээ.

Edam Entertainment-ийн мэдээлснээр, Сөүлийн Asan Medical Center-т 100 сая воны хандив өгсөн бол үлдсэн мөнгийг орон нутгийн дөрвөн буяны байгууллагад хуваарилжээ.

Хандивыг санхүүгийн бэрхшээлтэй өвчтөнүүдийг дэмжих, хүүхэд болон өсвөр үеийн боловсрол, соёлын хөтөлбөр, ганцаараа амьдардаг ахмад настнууд, эмзэг нөхцөлд буй ганц бие эхчүүд, мөн хөгжлийн бэрхшээлтэй иргэдэд зориулсан тусламжид зарцуулах юм байна.

IU нь төрсөн өдөр, дебютийн ой зэрэг чухал өдрүүдээр тогтмол буяны ажил хийдэг бөгөөд өмнө нь хүүхдийн баяраар ч мөн 100 сая вон хандивлаж байжээ.