Дуа Липагийн хуримын хослол загварын ертөнцөд шуугиан тарив

Поп од Dua Lipa жүжигчин Callum Turner-тай Лондон хотод хуримаа хийхдээ уламжлалт хуримын даашинзны оронд юбкатай хослол өмссөн нь загварын ертөнцийн анхаарлыг татаж байна.

Түүний сонголт нь 1971 онд Bianca Jagger рок од Mick Jagger-тай гэрлэхдээ өмссөн домогт хуримын хослолоос санаа авсан гэж загварын шинжээчид үзэж байна.

Дуа Липа зааны ясан өнгийн юбкатай хослол, өргөн хүрээтэй малгайгаар гоёж, уламжлалт сүйт бүсгүйн дүр төрхөөс өөр сонголт хийжээ. Энэхүү загварыг Schiaparelli брэндийн бүтээлч захирал Daniel Roseberry урласан байна.

Загварын мэргэжилтнүүдийн үзэж буйгаар орчин үеийн сүйт бүсгүйчүүд өөрсдийн зан чанар, хэв маягийг илэрхийлэхийг илүүд үзэх болсон нь ийм төрлийн хуримын хослол дахин эрэлттэй болоход нөлөөлжээ. Өмнө нь Amal Clooney, Emily Ratajkowski зэрэг алдартнууд мөн адил юбкатай хослолыг хуримандаа сонгож байсан юм.

Загварын салбарынхны хэлснээр юбка, пиджак хослуулсан хуримын төрх нь сүйт бүсгүйчүүдэд өөрийн онцлогийг илэрхийлэх, уламжлалт хэв маягаас ангид байх боломжийг олгодог байна.

Дуа Липа болон Каллум Тернер нарын хурим 5-р сарын 31-нд Лондонд болсон бөгөөд хосууд цаашид Италийн Сицили аралд хэд хоног үргэлжлэх хуримын баяр хийхээр төлөвлөж байгаа гэх мэдээлэл гарчээ.

Загвар судлаачдын үзэж буйгаар Дуа Липагийн энэхүү сонголт нь хуримын загварт шинэ чиг хандлага авчирч, уламжлалт даашинзнаас өөр хувилбаруудын эрэлтийг нэмэгдүүлэх магадлалтай байна.