Apple компани iPhone 18 загвараа есдүгээр сарын 18-нд худалдаанд гаргахаар төлөвлөж байна

Apple компани iPhone 18 Pro болон шинэ бүтээгдэхүүнүүдээ есдүгээр сарын 9-нд танилцуулах гэж байна. Харин шинэ iPhone-ийн урьдчилсан захиалга есдүгээр сарын 12-нд эхэлж, есдүгээр сарын 18-нд худалдаанд гарах төлөвтэй байгаа талаар “Forbes” мэдээлжээ.

Apple-ийн шинэ бүтээгдэхүүний танилцуулга есдүгээр сарын 9-ний лхагва гарагт АНУ-ын Калифорни мужийн Купертино хот дахь “Стив Жобсын нэрэмжит театр”-т болно. Арга хэмжээ АНУ-ын Номхон далайн цагаар өглөөний 10:00 цагт эхлэх нь албан ёсоор батлагдсан байна.

Тус арга хэмжээний үеэр iPhone 18 Pro, iPhone 18 Pro Max, Apple-ийн анхны эвхэгддэг iPhone, Apple Watch Ultra 4 болон Apple Watch Series 12-ыг танилцуулна гэж таамаглаж байна. Мөн шинэ iPhone-уудын үнэ болон өмнөх загваруудын үнэ өөрчлөгдөх эсэх талаар мэдээлэх төлөвтэй байна.

Шинэ iPhone-ийн урьдчилсан захиалга ердийн хуваариар есдүгээр сарын 11-нд эхлэх ёстой боловч энэ өдөр АНУ-д 2001 оны есдүгээр сарын 11-ний халдлагын 25 жилийн ой тохиож байгаа юм. Тиймээс Apple урьдчилсан захиалгыг нэг өдрөөр хойшлуулж, есдүгээр сарын 12-ны бямба гарагт эхлүүлэхээр төлөвлөж байгаа гэх мэдээлэл гарчээ.

Мөн урьдчилсан захиалга эхлэх цаг өөрчлөгдөж, АНУ-ын Номхон далайн цагаар ердийн өглөөний 05:00 цагийн оронд шөнө дунд буюу 00:00 цагт эхэлж магадгүй байна. Гэхдээ энэ мэдээллийг Apple компани одоогоор албан ёсоор батлаагүй байна.

Харин iPhone 18 Pro болон iPhone 18 Pro Max-ийг есдүгээр сарын 18-ны баасан гарагт дэлгүүрүүдээр худалдаалж эхэлнэ гэж таамаглаж байгаа аж. Apple шинэ iPhone-уудаа танилцуулснаас хойших долоо хоногийн баасан гарагт худалдаанд гаргадаг уламжлалтай тул энэ өдөр хамгийн боломжит хугацаа гэж үзжээ.

Шинэ эвхэгддэг iPhone-ийн худалдаанд гарах хугацаа одоогоор тодорхойгүй байна. Зарим мэдээллээр урьдчилсан захиалга нь есдүгээр сарын сүүл хүртэл хойшилж болзошгүй ч бусад шинэ бүтээгдэхүүний хамт худалдаанд гарах боломжтой гэсэн таамаг ч байна.

Apple компани есдүгээр сарын 9-нд болох танилцуулгын үеэр шинэ бүтээгдэхүүнүүдийн үнэ, үзүүлэлт, худалдаанд гарах хугацаа болон урьдчилсан захиалгын товыг эцэслэн зарлах төлөвтэй байна.