IU 15 жил нөхөрлөсөн хамгийн дотны найз болох жүжигчин Ю Ин На-д зориулж шинэ дуу гаргажээ

Өмнөд Солонгосын дуучин IU 15 жилийн турш нөхөрлөсөн дотны найз, жүжигчин Ю Ин Натайгаа өнгөрүүлсэн дурсамж, нөхөрлөлөө шинэ уран бүтээлдээ шингээжээ.

Түүний “Dear My Crazy Soulmate” нэртэй дуу нь хоёр уран бүтээлчийн олон жилийн нөхөрлөлөөс сэдэвлэсэн байна. 

IU болон Ю Ин На нар 2010 онд “Heroes” телевизийн нэвтрүүлэгт хамт оролцох үеэрээ танилцаж, улмаар дотнын найзууд болжээ. Хэдийгээр тэдний насны зөрүү 11 жил боловч нөхөрлөл нь улам батжиж, фэнүүд нь тэднийг “IU-Inna” хэмээн өхөөрдөн нэрлэх болсон байна.

IU өмнө нь Ю Ин Наг өөрийн хамгийн дотны найз, хамгийн үнэнч дэмжигчдийн нэг хэмээн ярьж байсан бөгөөд түүний уран бүтээлд найз нь олонтаа урам өгдөг тухайгаа ч хуваалцжээ.

Тухайлбал, IU дүрийн сэтгэл хөдлөл ихтэй дуу зохиохдоо Ю Ин Наг төсөөлдөг бөгөөд зураг авалтын үеэр найзыгаа санаж байхдаа “You” дуугаа бичсэн тухайгаа өмнө нь ярьж байжээ.

Харин энэ удаа IU 15 гаруй жилийн нөхөрлөлөө дуугаар илэрхийлж, “Dear My Crazy Soulmate” бүтээлээ гаргасан байна. Уг дуу нь түүний шинээр гаргасан хоёр дуу бүхий цомогт багтсан бөгөөд “From This Star” дууны хамт сонсогчдод хүрчээ.

Олон жилийн нөхөрлөл, дурсамж, бие биедээ өгсөн дэмжлэгээ уран бүтээлээрээ илэрхийлсэн IU-ийн шинэ дуу фэнүүдийн анхаарлыг татаж байна.