Г.Пүрэвдэлгэр: Яриад байгаа кино нь хаана байсныг нь хурааж байгаа бид мэдэхгүй шүү дээ

Ноорог.мн сайтад хойшлуулашгүй ажиллагаа явуулан техник хэрэгсэл, бүтээж байсан баримтат киноны дүрс бүхий хард дискийг хурааж авсан талаар мэдээлсэн. Энэ асуудалд холбогдуулан Цагдаагийн Ерөнхий газраас мэдээлэл өглөө. 

ЭЦА, Кибер гэмт хэрэгтэй тэмцэх хэлтсийн дарга хурандаа С.Тайван: 

- Ноорог.мн сайтын хэвлэн нийтлэх үйл ажиллагаа,нийтлэл, постер контенттой холбоотой ямар нэгэн мөрдөн шалгах болон гүйцэтгэх ажиллагаа явуулаагүй. Хэвлэн нийтлэх эрх чөлөөтэй ямар ч холбоогүй. Хувь хүний нууцад халдах задруулах,  цахим мөрийтэй тоглоом зохион байгуулах, гэмт хэргийн сэжүүр, шинж тэмдэг байсан учраас прокурорын хяналт дор мөрдөн шалгах ажиллагаа явуулж байна. Мөрдөн шалгах ажиллагааны хүрээнд хуульд заасан үүргийн хүрээнд мэдүүлэг авч явуулсан. Хууль зөрчсөн зүйл байхгүй. 

ЦЕГ-ын Хэвлэл мэдээлэл, олон нийттэй харилцах хэлтсийн дарга Дэд хурандаа Г.Пүрэвдэлгэр: 

- 19.9 гэдэг заалтын тухай цахимд түгсэн мэдээллийг мэдэхгүй байна. Мөрдөн шалгах ажиллагааны явцад баталгаажуулж, шийдвэрлэнэ. Иргэдийн мэдээллийг хууль бусаар олж авсан, мөрдөн мөшгөх, мэдээллийг цуглуулах гэх мэт үйлдэл урьдчилсан байдлаар тогтоогдсон. Гар утасны кодыг нь тайлуулж нэгжлэг хийсэн. Иргэний утсыг шалгах нь нээлттэй шүү дээ, хуулийн дагуу. 

Гомдол гаргасан иргэний талаар мэдэхгүй байна. Мөрдөн шалгах ажиллагааны явцад нарийн тогтооно.