Т.Даваадалай: Явган хүний замыг чанаргүй барьсан ААН-үүдээр асуудлыг нь шийдүүлнэ

Нийслэлийн хэмжээнд энэ онд 167 мянган м.кв явган зам талбайг шинэчлэхээр төлөвлөсөн. Өнөөдрийн байдлаар 88 мянган м.кв талбайг шинэчилж, ажлын явц 53 хувьтай үргэлжилж байна.

Энэ хүрээнд Нийслэлийн Засаг даргын нэгдүгээр орлогч Т.Даваадалай болон холбогдох албаныхан Сүхбаатар дүүргийн 4 дүгээр хороо, Улаанбаатар их дэлгүүр орчимд ажиллажээ. 

Нийслэлийн Засаг даргын нэгдүгээр орлогч Т.Даваадалай “Явган хүний замын ажлын нийт гүйцэтгэлийг 55 хувьд хүргэсний дараагаар зогсоож, ирэх оны хавар үргэлжлүүлэн дуусгана. Явган хүний зам шинэчилснээр Улаанбаатар хотын явган замын хэмжээ 30 хувиар нэмэгдсэн.

Тодруулбал, иргэдэд ээлтэй, алхахад тохиромжтой байлгах үүднээс нийтийн эдэлбэр газар, автобусны буудал, зөвшөөрөлгүй өргөтгөл зэргийг чөлөөлж явган замыг шинэчилсэн. Явган замыг шинэчилж дууссан байршлуудад Улсын комисст хүлээлгэн өгөх ажил эхэлсэн.

Зарим тохиолдолд чанарын шаардлага хангаагүй хэсгүүдийг Улсын комисс хүлээж авахгүй. Чанаргүй зам барьсан ААН-үүдээр уг асуудлыг нь шийдүүлнэ” гэлээ. 

Мөн “Сант-Өндөр” ХХК нь тавдугаар сарын 19-ний өдөр ажлаа эхлүүлсэн боловч өнөөдрийн байдлаар ажлын явц 36 хувьтай байна. Тус компани Баруун 4 замаас Зүүн 4 зам хүртэл 11.6 км буюу 27 мянган м.кв талбайг шинэчлэх байсан ч гэрээндээ багтааж ажлаа гүйцэтгээгүй тул гэрээг цуцалсан байна.