Хөх томруулах хагалгаа хийсэн болон хийлгэсэн этгээдүүдийг олон нийтийн өмнө шүүжээ

Хууль бусаар хөх томруулах хагалгаа хийсэн этгээд болон мэс засал хийлгэсэн 20 гаруй насны эмэгтэйчүүдийг Хойд Солонгост олон нийтийн өмнө шүүсэн тухай мэдээлэл гарчээ.

Хойд Солонгосын цахим хэвлэл Daily NK-ийн энэ сарын 25-ны өдөр мэдээлснээр, Хойд Хванхэ мужийн эх сурвалж "Есдүгээр сарын дундуур Саривон хотод хууль бусаар хөх томруулах мэс засал хийсэн этгээд болон хагалгаанд орсон эмэгтэйчүүдийн шүүх хурал болсон" гэжээ. Эх сурвалжийн мэдээлснээр тус хагалгааг хийсэн нэг хүн, хагалгаанд орсон хоёр эмэгтэйг хотын төвд байрлах Соёлын төвд болсон шүүх хурлын өмнө авчирсан байна.

Хууль бус хагалгаанд ашигласан эмнэлгийн тоног төхөөрөмж, импортын силикон, бэлэн мөнгө зэрэг нотлох баримтуудыг дэлгэн үзүүлжээ. Уг хагалгааг хийсэн хүн Анагаахын сургуулиа орхисон мэс заслын их эмч байсан бөгөөд Хятадаас силикон оруулж ирээд хууль бусаар хөх томруулах хагалгааг эх орондоо хийж байжээ. Тэрбээр эмнэлгийн лиценз эзэмшдэг эсэх нь тодорхойгүй байгаа аж. 

Тус хотын Олон нийтийн аюулгүй байдлын газар хууль бус гоо сайхны мэс заслыг таслан зогсоох тушаал авангуутаа нөхцөл байдлыг шалгаж эхэлсэн бөгөөд уг хэрэгт холбоотой гэх цуурхал тараасан байшинд нууцаар орсон гэх мэдээлэл байна. Эх сурвалж “Зөвхөн хагалгаа хийсэн хүн төдийгүй хамт чирэгдэж гарсан 20 гаруй насны хоёр эмэгтэй шүүх хурлын туршид толгойгоо өндийлгөж чадаагүй” хэмээн тайлбарлав. Хоёр эмэгтэй бие махбодоо сайжруулахыг хүссэн учраас хөх томруулах хагалгаанд орсон тухайгаа мэдэгджээ. 

Гэтэл прокурор тэднийг хатуу шүүмжилж, “Социалист тогтолцоонд амьдарч байсан эдгээр эмэгтэйчүүд хөрөнгөтний ёс заншилд бохирдож, ялзарсан капиталист араншин гаргаж байна” хэмээн хатуу шүүмжилсэн байна. Шүүгч мөн хөх томруулах мэс заслыг "социалист бус үйлдэл" гэж тодорхойлж, "Тэд байгууллага, бүлэглэлдээ үнэнч байх санаагүй, харин хоосон зүйлд автаж, эцэстээ социалист тогтолцоог идэмхийрүүлэх хорт өвс болж хувирсан" гэжээ. Мөн хатуу шийтгэхийг сануулсан аж. Түүнчлэн шүүх хурлыг үзэж байсан иргэд эмэгтэйчүүдийг хагалгаанд орсон эсэхийг баталгаажуулах зорилгоор олон нийтийн биеийн үзлэг хийсэнд цочирдсон тухай мэдээлсэн байна. Хотын Олон нийтийн аюулгүй байдлын газраас энэхүү олон нийтийн шүүх хурлыг гоо сайхны мэс засал хийлгэсэн гэж сэжиглэгдсэн эмэгтэйчүүдийг эрчимтэй шинжилгээнд хамруулах боломж болгон ашиглахаар төлөвлөж байгаагаа зарласан. Биеийн галбирт мэдэгдэхүйц өөрчлөлттэй эмэгтэйчүүдийг илрүүлж, эрүүл мэндийн үзлэгт хамруулж, үнэхээр хагалгаанд орсон эсэхийг тогтоохоор төлөвлөжээ.

Эх сурвалж: Naver News