Н.Алтаншагай: Хөгжлийн бэрхшээлтэй иргэд, тэдний асран хамгаалагчдын тэтгэмжийг 30 хувиар нэмэгдүүлэх саналд нэгдлээ

Монгол Улсын Их Хурал 2024 онд анх удаагаа 126 гишүүнтэйгээр ажиллаж эхэлсэн. Энэ ч утгаараа салбар салбарын чиглэлээр ажлын хэсэг байгуулагдан ажиллаж байна.

 

Үүний нэг нь “Хөгжлийн бэрхшээлтэй хүний эрхийг хамгаалах, эрхийг дэмжих” ажлын хэсэг байгуулагдаж, хуульд нэмэлт өөрчлөлт оруулахаар ажиллаж байна.

 

Хөгжлийн бэрхшээлтэй иргэд, тэднийг асран хамгаалагчтай энэ оны эхэн буюу 1, 2 дугаар сард ажлын хэсгийн гишүүд болох УИХ-ын гишүүн О.Саранчулуун, Ж.Баясгалан нарын хамтаар санал солилцон уулзаж олон асуудлыг хөндөж байсан. Өнөөдрийн байдлаар байнгын асаргаа шаардлагатай хөгжлийн бэрхшээлтэй хүүхдийн амьжиргааг тэтгэх мөнгөн тэтгэмжид 397.500, асаргааны тэтгэмжид 302.500, нийгмийн халамжийн тэтгэмжид 397.500 сар бүр тус тус олгож байна.

 

Энэхүү тэтгэмжээр бүтэн сар амьжиргаагаа залгуулахад туйлын хүндрэлтэй байгаа тул нийгмийн халамжийн сангаас олгож байгаа нийгмийн халамжийн тэтгэвэр, асаргааны тэтгэмжийн хэмжээг төсөв, мөнгөний бодлоготой уялдуулж, хөгжлийн бэрхшээлтэй хүний нийгмийн баталгааг хангаж, улсын дундаж хэмжээнд хүргэн нэмэгдүүлэх асуудлыг онцгойлон авч үзэж, шаардлагатай эх үүсвэрийг нэмэгдүүлэн 2026 оны улсын төсөвт тусгах саналыг Монгол Улсын Ерөнхий сайдад хүргүүлэхээр ажлын хэсгийн гишүүн Ж.Баясгалангийн санаачилсан саналд нэгдэж байна.