Ай, Хосын хорвоо .....

Аргагүй л жаргалтайн дэлгэр болсон хосын хорвоо юм даа. Гэвч өнөөдөр Монгол Улсын хэмжээнд гэр бүл салалтын тоо, статистик үзүүлэлт өндөр байгаа. Өөрөөр хэлбэл, хосоороо амьдрахыг хүсэхгүй байна гэсэн үг. Гэтэл Төрийн өндөр дээд, бага, дунд аливаа шатанд хосоороо байхыг ихэд эрхэмлэх болжээ. Ялангуяа өндөр дээд түвшинд хосоороо үзэгдлүүд элбэг дэлбэг болсон.  

 

Одоогийн байдлаар гэхэд Ерөнхий сайд нь ч хосоороо, эрх баригч намын дарга нь ч хосоороо, УИХ дахь бүлгийн дарга нь ч хосоороо, төр, түмнийг дээрэмдсэн ч ах дүүс хосоороо, эхнэрээ яргалсан ч ах дүү хосоороо. Идсэн уусан ч найз нөхөд хосоороо, Төрийн сайд нар ч хорол тоононын дор хосоороо. Төсөв тоносон ч хосоороо, тендер “гөвсөн” ч хосоороо, нууц гэрээ байгуулсан ч Төрийн сайд нар нь хосоороо. Ёстой л хосын хорвоод халгиж цалгиж яваа түмэн.

 

Жишээ дурдъя л даа. Ах намын Бага хурлаар даргын төлөөх өрсөлдөөн болж, Ерөнхий сайд Г.Занданшатар ялагдал хүлээж, УИХ-ын дарга Д.Амарбаясгалан ялсан. Гэтэл ялагдсан нөхөр нь Ерөнхий сайдынхаа албыг хашиж, ялагдлаа хүлээн зөвшөөрдөггүй, ялсан нөхөр нь дүрмийн хувьд Ерөнхий сайд болчихсон гээд явахаар Монгол Улсын Ерөнхий сайд нь ч хосоороо. Нөгөө талаар Г.Занданшатар  Бага хурлыг хууль, дүрмийн бус болсон гэж үзэж, албаа хашсаар байгаагаас харвал МАН-ын дарга ч хосоороо.

 

Улс төрийн үймээнд Ерөнхий сайд гарч ирээд Хууль зүй, дотоод хэргийн сайд Л.Мөнхбаатарыг огцруулалгүйгээр Б.Энхбаярыг сайдаар томилчихсон. Тэгвэл Л.Мөнхбаатар нь тамга тэмдэгтэйгээ сайдын алба залгуулаад байдаг, энд Б.Энхбаяр нь Гүйцэтгэх засаглалын тэргүүн томилсноо мэдэгдчихсэн сайд яваад байдаг. Ингэхээр Монгол Улсын Хууль зүй, дотоод хэргийн сайд ч хосоороо.

 

Бас болоогүй ээ. Амин хувийн эрх ашиг хөөж улстөржсөн МАН-ын бүлгийн дарга Ж.Бат-Эрдэнэ бүлгийнхээ хуралдааныг ч зохион байгуулж чадахгүй байгаа учраас бүлгийн гишүүдийн олонх нь санал нэгдэн, Ерөнхий сайдын хамт хуралдаад “гусчихсан”. Ингээд зогсохгүй эмч багш нарын цалинг нэмэх бүлгийн шийдвэр гаргаад туйлж туйлж Б.Батжаргалыг бүлгийн даргаар томилчхов. Харин  хусуулсан дарга Ж.Бат-Эрдэнэ бүлгийн хуралдаан нь олон хууль дүрэм зөрчсөн, хүчингүй. Би бүлгийн дарга хэвээрээ хэмээн индэр дээр гараад ирэхээр МАН-ын бүлгийн дарга ч хосоороо.

 

Жаахан цааш өнгийхөөр Ерөнхий сайд асан Л.Оюун-Эрдэнэ төсвөөс мөнгө хумслах болохоороо өөрийн ах найруулагч Б.Баатартайгаа нийлэн, нууцын зэрэгт авч байгаад хусчихна. Төр, түмнээ дээрэмдэх болохоороо ах дүү ч хосоороо.

 

Ерөөсөө Төрийн сайд нар нь хулгай хийх болохоороо хосоороо очиж нууцын зэрэглэлд авч байгаад хийчихнэ. Тухайлбал, Зам, тээврийн хөгжлийн сайд Б.Дэлгэрсайхан, Аж үйлдвэр, эрдэс баялгийн сайд асан Ц.Туваан нар хосоороо, Ерөнхий сайд асан Л.Оюун-Эрдэнэ, Шадар сайд Т.Доржханд нар хосоороо очоод “Харбины гэрээ” гэгч луйвраа хийчихсэн.

Тендер “гөвөх” болохоороо хэдэн зуун тэрбумаар нь яриад Зөвлөхтэйгөө хосоороо, албан тушаал арилжих болохоороо ах дүүс хосоороо, олны ярьж байгаагаас харвал сайд нар нь ч нэг гэрт хосоороо гэх мэтээр жаргаж өгнө. 

 

Сүүлдээ бүр эхнэрээ яргалсан НИТХ-ын төлөөлөгчийг шүүхэд өгөхөөр “Та нар эвлэрэх хэрэгтэй” хэмээн зургаан сарын хугацаа өгч, хосоороо нүдүүлж байхыг санал болгоно. Гэтэл ах дүү хоёр ч хосоороо эхнэрээ яргалдаг гэдгийг баримтаар дэлгэхээс эхлээд бүхий л зүйл хосоороо.

 

Ай хосын хорвоо гэж ... жинхэнэ утгаараа Монгол Улсын Төр, өндөр дээд түвшинд л  хосоороо жаргаж сууна даа.   

 

Их Мэдэгч