Сайд гэх садаа нараа явуулахгүй бол урт наслахгүй шүү

МАН-ын Их хурал өнгөртөл Засгийн газарт ч, УИХ-ын дарга нар гээд ямар нэг өөрчлөлт орохгүй байж таарна. Харин Их хурал өнгөрөв үү, үгүй юу Төрийн ордны булан тохой бүрд сайдын суудалд гэтэж, сэм сэмхэн яриа өрнөнө. Одоо ч эрт эхэлчихсэн байгаа. Хамгийн гол нь Их хурлын уур амьсгалыг ажиж байгаа. Мэдээж хэрэг, Г.Занданшатар нь ч бай, өөр хэн нэгэн ч бай Ерөнхий сайд болоход энэ тахимд үлдэх сайд тийм ч олон биш байх. Юуны өмнө Хууль зүй, дотоод хэргийн сайд нь үлдэж таарна. Засгийн газрын хэрэг эрхлэх газрын дарга С.Бямбацогт, Хүнс, хөдөө аж ахуй, хөнгөн үйлдвэрийн сайд Ж.Энхбаяр, Эдийн засгийн хөгжлийн сайд Н.Учрал, Гадаад хэргийн сайд Б.Батцэцэг гээд цөөн хэдэн сайд үлдэх болов уу. Тэгэхээр үлдэхийг нь тоолж байхаар явахыг нэрлэсэн дээр. Гэхдээ дээрх  сайд нарыг сар наранд хүрэх мундгууд, сайндаа үлдэж байна гээгүй юм шүү. Ерөнхий сайд нь угаасаа бөөрнөөсөө салгахгүй учраас тэр.

 

Юуны өмнө Ерөнхий сайд, намын дарга нь таван намаас аль аль намыг сонгохоос шалтгаална. Эх сурвалжийн хэлж байгаагаар одоо Засгийн газарт хамтарч байгаа ХҮН нам, ИЗНН гарах бололтой. Гэхдээ АН-д санал тавьж, дарга нь нааштай байгаа ч бүлгийн зарим гишүүд дургүйцэж байгаа аж. Тэгэхээр одоо байгаа бүтцээс ХҮН намын хоёр, ИЗНН-ын нэг явна. Явсан ч дээр. Байнга эрх баригчдын халаасанд угжны хурга шиг байдаг Т.Доржхандаас эхлээд явах хэрэгтэй.

 

Харин МАН-аас С.Амарсайхан дүрмийн дагуу явсан, мөн байнга хэл ам дагуулж байдаг Зам тээвэр хөгжлийн сайд Б.Дэлгэрсайхан, Эрчим хүчний сайд Б.Чойжилсүрэн, Хот байгуулалт, барилга орон сууцжуулалтын сайд Э.Бат-Амгалан, Аж үйлдвэр, эрдэс баялгийн сайд Г.Дамдинням нар энэ танхимаас явна гэх сураг бий. Үнэн ч байх.  

 

Б.Дэлгэрсайхан сайдын хувьд ашиг сонирхлын зөрчилтэйгөөс гадна буруу зүгийн олон зүйлд холбогдож явдаг хүн. Хамгийн сүүлд гэхэд “Харбины гэрээ”-ний нэг буруутан болоод байгаа. Үүнээс гадна ёс зүйгүй, бусадтай зүй бусаар харьцдаг гэх мэт олон асуудал бий.

 

Шуудхан хэлэхэд одоогийн сайд нарт зүгээр сайд нэртэй садаа нар олон бий. Г.Дамдинням гэж Шатахуун түгээгч шиг нөхөр яаж аж үйлдвэр, эрдэс баялаг хэмээх том салбарыг удирдах юм. “Өвөл болохоор хүйтрэх нь тодорхой, хавар болохоор аяндаа утаа арилна” гээд сууж байгаа Б.Чойжилсүрэнтэй энэ өвлийг давах ч үгүй хөлдөж үхнэ.

 

Мөн дүүргийн даргаар дөрвөн цаг ажиллаж үзсэнээс өөр намтаргүй Э.Бат-Амгалан хэрхэн хот байгуулалт гэх нүсэр салбарыг удирдах юм. Үүнээс гадна багшийн ширээнд ч бүрэн тухалж чадаагүй, соёл урлагийн “А” ч байхгүй Ч.Ундрам ямар учраар Монгол Улсын нүүрийг олон улсад тахалж байдаг ганц салбараа өгч болох юм. Тэгээд ч “Би цэргийн алба хаасан учраас Батлан хамгаалахын сайд байх ёстой” хэмээн зогсох цахилгаанчин Д.Батлут, АТГ-т тариа будааны асуудлаас үүдэн шалгагдаж асан тариачин Т.Аубакир гээд бүгд л саад болж байхаар яваад өгөх байх. Явах байх биш, энэ Засгийн газраас нэр цохон явуулах хэрэгтэй. Бас явах эсэх нь эргэлзээ төрүүлж байгаа нөхдөөс Эрүүл мэндийн сайд Ж.Чинбүрэн, Сангийн сайд Б.Жавхлан нар бий. Яах аргагүй салбарын л хүмүүс.

 

Энд юу хэлэх гээд байна вэ гэхээр тариачин ногоочин, цахилгаанчин байх нь хамаагүй. Гагцхүү салбар салбартаа бодлого гаргаад явж ирсэн, цааш бодлого гаргаад явах сайд алга юм. Тиймээс МАН хоёр хуваагдсан, таван намын төлөөллөөс бүрдэх парламенттай Засгийн газар урт наслахгүй шүү. Танхимаа сайн бүрдүүлээрэй л гэх байна.

 

Тухайлбал, Б.Дэлгэрсайханы хувьд 2016 оноос хойш УИХ-д сонгогдож ямар хууль батлуулав, хоёр удаа сайдаар ажиллахдаа ямар бодлого гаргав гэхээр хэлэх үгүй байхгүй.

 

Б.Чойжилсүрэнгийн хувьд ойлгомжтой. УИХ-д таван удаа сонгогдож, байнгын хорооны даргаар хоёр удаа, сайдаар хоёр удаа ажилласан бодлого бүү хэл бодол ч тээлгүй энэ төрд 20 жил ажиллаж байна. Энэ мэт нөхдөөс салахгүй бол Засгийн газар урт наслахгүй шүү.

 

Их Мэдэгч