Л.Оюун-Эрдэнэ ээ цайгаа авъя аа

Тусламжийн 30 мянган хонины махыг хятадууд Уханий голомтод очиж ажилласан бүх эмч нартаа хүртээмжтэйгээр илгээсэн бөгөөд хониноосоо үнэтэй шахуу гоёмсог сав, баглаа боодолтой, Монголын ард түмний бэлэг гэдгийг нь онцгойлон тайлбарласан тус бэлгийг Хятадын өнцөг булан бүрт хүлээж авсан хүмүүс нь ихэд талархан, сошиалд гайхуулснаар "Монголын 30 мянган хонь" хоёр дахь удаагаа Хятадын сошиалыг түймэрдсэн билээ.

 

Харин манай хонины хариуд Хятадын төрөөс экспортын уламжлалт гурван цайны хоёр нь болох, Хятаддаа хамгийн алдартай Чинжуан цай, Цайхуа цайг 7000 ширхгийг Монголын малчдад илгээсэн. Түүгээр ч барахгүй Монголын ард түмний эрт цагаасаа тэмээн жингээр тээвэрлэн авчирдаг асан "Чуань" ханз бүхий дөрвөлжин урт цай нь монголчуудын сүүтэй цайны үндсэн түүхий эд гэдгийг судлан нягталсны эцэст тухайн цайны өнөөгийн хувилбар болох, Хятадын үндэсний брэнд Чан Шэнь Чуань цайг илүү ахиу буюу 30 мянган ширхгийг хамтатган өгчилгөсөн юм. Эдгээр цайны навчийг маш нарийн технологиор бэлтгэж хатуу хяналт, шалгалтаар үйлдвэрлэдэг бөгөөд Хятадын ард түмний чин сэтгэл, билэг ерөөлийг тээн очиж буйг Ардын их хурлаас нь бэлтгэсэн албан мэдээнд ахин дахинтаа онцолж байсныг тод санаж байна.

 

Үүнийг Монгол Хятадын гаалийн ТЭГ бүрдүүлэлттэйгээр хил нэвтрүүлэн хүргэх, тээвэрлэх ажлыг Элчин сайд Т.Бадрал шуурхай зохион зохион байгуулсныг ч миний бие баттай гэрчлэх билээ. Учир нь тухайн үед би Бээжин хотноо Хятадын төв телевиз ССТВ-гийн монгол хэлний редакцид мэргэжилтнээр ажиллаж байсан бөгөөд тухайн мэдээ мэдээллийг Хятадын олон нийтэд түгээх ажлыг гардан гүйцэтгэсэн юм. Ерөнхий сайд асан Л.Оюун-Эрдэнэ Хятадын телевизэд өгсөн ярилцлагадаа "Хонины хариуд өгсөн цай"-г хүлээн авсан талархлаа маш тодорхой ярьсныг дорх холбоосоор сонирхож болно. Хамгийн хачирхалтай нь хятадууд Монголын хонийг улс даяараа гайхуулсан бол, монголчууд Хятадын цайны барааг хараагүй билээ. https://www.facebook.com/reel/1518086335983043

 

Эх сурвалж: Zanda Zanda