Сонгинохайрхан нэгдсэн эмнэлгийн яаралтай тусламжийн тасгаар хоногт 308 хүүхэд үйлчлүүлжээ

Сонгинохайрхан Нэгдсэн эмнэлгийн Яаралтай тусламжийн тасагт сүүлийн долоо хоногт нийт 2285 хүүхэд үйлчлүүлснээс 389 хүүхэд хэвтэн эмчлүүлж, 1896 хүүхдэд үзлэг хийн, гэрийн эмчилгээ зөвлөжээ. Яаралтай тусламжийн тасагт хандсан хүүхдүүдийн дийлэнх хувийг 5-14 насныхан эзэлж байна.

Сүүлийн долоо хоногт яаралтай тусламжаар үйлчлүүлэх хүүхдийн тоо өдөрт 438 болж нэмэгдэж байсан бол, хуваарилалт зохицуулалт хийснээр арваннэгдүгээр сарын 25-ны өдрөөс яаралтай тусламжаар үйлчлүүлэх хүүхдийн тоо өдөрт 308 болж буурчээ.

Сонгинохайрхан нэгдсэн эмнэлэг нь нийт 365 ортой. Үүнээс хүүхдийн эрчимт эмчилгээ болон хэвтэн эмчлүүлэх 140 ортой. Нэмэлтээр 40 ор дэлгэн хүүхдийн тасагт нийт 180 ортой ажиллаж байна. Орны эргэлт одоогийн байдлаар 93 хувьтай байна.

2025-2026 оны томуугийн улирал эхэлснээс хойш буюу аравдугаар сарын 14-нөөс арваннэгдүгээр сарын 24-ний хооронд ХӨСҮТ-ийн  вирус судлалын лабораторид нийт 81 сорьц илгээж шинжлэхэд A(H3N2), амьсгалын замын синцитиаль, иж томуу, AЗСВ вирусүүд тодорхойлогджээ.

Мөн арваннэгдүгээр сарын 27 өдрийн байдлаар эмнэлэгт хэвтэн эмчлүүлж буй 286 хүүхдээс асуумжийн аргаар томуугийн эсрэг дархлаажуулалтын хамралтыг судлахад 51 хүүхэд буюу 18 хувь нь хамрагдсан, 232 буюу 82 хувь нь хамрагдаагүй байна.



Эрүүл мэндийн сайд Ж.Чинбүрэн: Улирлын томуугийн дэгдэлт улсын хэмжээнд алаг цоог дэгдэлтээс “Улсын хэмжээний дэгдэлт”-ийн түвшинд шилжиж нэмэгдсэн тул эрчимт эмчилгээ болон хүүхдийн орны зохицуулалтад анхаарч ажиллах, Өрхийн эрүүл мэндийн төвүүдтэйгээ уялдаа холбоогоо сайжруулан, ажиглалт хийх хугацааны эмчилгээ, заавар зөвлөмжийг иргэдэд сайтар тайлбарлан өгч ажиллахыг даалгалаа.




Сонгинохайрхан Нэгдсэн эмнэлэг хүүхдийн 40 ортой нэмэлт тасаг нээж, арваннэгдүгээр сарын 24-ны өдрөөс жижүүрийн хүүхдийн эмчийг нэмэгдүүлж, хүүхдийн үзлэгийг дөрвөн цэгээр явуулж байна. Мөн Яаралтай тусламжийн тасагт эрэмбэлэн ангилалтын ажилтны тоог найм болгон нэмэгдүүлж, үзлэгийн эргэлтийг эрчимжүүлэн ажиллаж байгаа талаар тус эмнэлгийн  Эмнэл зүй эрхэлсэн дэд захирал Д.Сүнжидмаа хэлэв.