Япон улс сүүлийн хоёр пандагаа Хятад руу буцаажээ

Япон улс сүүлийн хоёр аварга том пандагаа Хятад руу буцаахын өмнө олон мянган хөгжөөн дэмжигч Үэно амьтны хүрээлэнг зорьж, хайртай амьтадтайгаа сүүлчийн удаа уулзжээ. Энэ үйл явдал Япон, Хятадын харилцаа сүүлийн жилүүдэд хурцадсаны бэлгэдэл болж байна.

Ихэр панда Сяо Сяо, Лэй Лэй нар амралтын өдрүүдэд олон нийттэй сүүлчийн удаа уулзсаны дараа мягмар гарагт Токиогийн Үэно амьтны хүрээлэнгээс Хятад руу буцах юм. Тэд Японд төрсөн ч Бээжингийн “панда дипломат ажиллагаа”-ны бодлогын дагуу Хятадын өмчид тооцогддог.

Хоёр улсын харилцаа сүүлийн хэдэн жилийн хамгийн доод түвшинд хүрсэн энэ үед пандагийн явалтаар Япон улс сүүлийн 50 гаруй жилд анх удаа пандагүй болж байна. Үзэгчдийн зүгээс улс төрийн асуудлыг түр орхин, хайртай амьтдаа үдэх сэтгэл давамгайлж байв.

Сүүлийн хэдэн долоо хоногт панда үзэхээр ирэх хүмүүсийн урсгал эрс нэмэгдэж, амьтны хүрээлэн тасалбар сугалааны системд шилжсэн байна. Зарим иргэд тав хүртэл цаг дугаарлаж, сүүлчийн уулзалтад оролцжээ.

Сяо Сяо, Лэй Лэй нар 2021 онд Үэно амьтны хүрээлэнд төрсөн бөгөөд өмнө нь эцэг эх, ах эгч нарыг нь мөн Хятад руу буцаасан юм. Япон улс 1972 онд Хятадтай дипломат харилцаагаа хэвийн болгосны дараа анхны пандагаа хүлээн авч байв.

Сүүлийн үед Японы удирдлагын Тайванийн асуудлаарх мэдэгдлүүд Хятадын дургүйцлийг төрүүлж, Бээжин эдийн засгийн дарамт үзүүлэх арга хэмжээ авч эхэлсэн. Үүний улмаас Хятадаас Япон руу зорчих жуулчдын тоо огцом буурч, зарим бүс нутгийн аялал жуулчлал тодорхойгүй байдалд оржээ.

Үэно амьтны хүрээлэнгийн удирдлагын зүгээс пандад зориулсан байгууламжийг хэвээр хадгалж, цаашид Хятадтай хамгаалал, үржлийн чиглэлээр хамтран ажиллах хүсэлтэй байгаагаа илэрхийлсэн байна. Тэд нэг өдөр панда Японд дахин ирнэ гэдэгт найдаж байгаагаа онцолжээ.

 

Эх сурвалж: BBC