П.Наранбаяр: Үндсэн цалин 742 мянган төгрөгөөр нэмэгдэж байгаа

Засгийн газрын өнөөдрийн /2026.01.28/ хуралдаанаас гарсан шийдвэрийг танилцуулах үеэр Боловсролын сайд П.Наранбаяр багш нарын цалингийн нэмэгдэлтэй холбоотой асуудлаар мэдээлэл өглөө. 

Энэ үеэр тэрбээр "Багш нарын цалинг нэмэхээс гадна тэнд байгаа үйлчилгээний ажилчдын цалинг мөн нэмж байгаа. Бидний хийж байгаа цалингийн нэмэгдлүүд Үйлдвэрчний эвлэлтэй байгуулсан гэрээ, нэмэлт хэлэлцээрийнхээ хүрээнд хийгдэж байгаа. 

Ямар байдлаар нэмэгдсэн бэ гэхээр нэгдүгээр сар их онцлогтой сар байдаг. Цалингаа бөөнөөр нь нэг удаа авах боломжтой байдаг. Яагаад гэхээр Төрийн сангийн үйл ажиллагаа нэгдүгээр сарын сүүлээр нээгддэг онцлогтой. Энэ хүрээнд цалин тавигдах үйл явц явагдаж байна. Бид хэлэлцээрт заасны дагуу үндсэн цалинг нэмж байгаа. 2025 оны нэгдүгээр сард үндсэн цалин 1,484,000 төгрөг байсан. Энэ нь 2026 оны нэгдүгээр сар гэхэд 2,226,000 төгрөг болж өсөж байгаа юм. 50 хувийн нэмэгдэл гэдэг нь энэ. Өөрөөр хэлбэл, ойролцоогоор 742 мянган төгрөгөөр өсөж байгаа юм. Сургуулийн өмнөх боловсролын буюу цэцэрлэгийн багшийн цалин гэхэд 1,559,000 төгрөгөөс 2,338,500 сая төгрөг болж өсөж байна. Үндсэн цалингийн өсөлт бол бодитой. Орон нутгийн нэмэгдэл 20, 40 хувь буюу өнгөрсөн жилийнхээрээ байгаа" хэмээв.