Фижи Улс энэ онд ДОХ-ын халдвар 3000-аас давна гэж тооцоолжээ

Вашингтон Пост сонины мэдээлснээр, Номхон далайн алдартай залуу хосуудын бал сарын аялалын газар болох Фижи улсад ХДХВ-ийн халдварын тоо сүүлийн үед огцом нэмэгдсэн нь олон улсын анхаарлыг татаж байна гэж мэдээллээ.

НҮБ-ын ДОХ-ын хамтарсан хөтөлбөр ( UNAIDS ) болон Фижи улсын Эрүүл мэндийн яамны мэдээлснээр Фижи улсад ХДХВ-ийн халдварын шинэ тохиолдол энэ онд 3000-аас давж, өнгөрсөн оныхоос хоёр дахин их байх төлөвтэй байна. Орон нутгийн эрүүл мэндийн статистик мэдээллээс харахад эдгээр шинэ тохиолдлын дийлэнх нь 15-34 насны залуу хүмүүсийн дунд бүртгэгдэж байгаа бөгөөд эхээс хүүхдэд халдвар дамжих тохиолдол нэмэгдэж байна. 

Орон нутгийн эрүүл мэндийн байгууллагууд энэхүү огцом өсөлтийг мансууруулах бодисын хэрэглээ нэмэгдэж, мансууруулах бодисын аюулгүй бус хэрэглээтэй холбон тайлбарлаж байна. 

Дэлхийн эрүүл мэндийн байгууллага (ДЭМБ)-ын өнгөрсөн оны 12-р сард гаргасан тайланд Фижи улсад мансууруулах бодис хэрэглэгчдийн дунд тариур хуваалцах өргөн тархсан болохыг тогтоожээ. 

"Bluetoothing" гэгддэг мансууруулах бодисын хэрэглээний хэт туйлширсан хэлбэр нь халдварын огцом тархалтад нөлөөлсөн гэж үзэж байна. Энэ бол аль хэдийн мансууруулах бодисын нөлөөнд орсон хүний цусыг өөрийн биед тарих үйл явц ажээ. Үүний үр дүнд нэг сая хүрэхгүй хүн амтай Фижи улсад 2024 онд ХДХВ-ийн халдварын 1583 шинэ тохиолдол бүртгэгдсэн бөгөөд зөвхөн 2025 оны эхний хагаст 1226 нэмэлт тохиолдол бүртгэгдсэн байна. Нөхцөл байдал улам дордсон тул Фижи улсын засгийн газар 1-р сард "ХДХВ-ийн дэгдэлт" -ийг албан ёсоор зарлаж, үндэсний хэмжээнд онцгой байдлын хариу арга хэмжээ авч эхэлсэн байна. 

Фижи улсын Эрүүл мэндийн яам халдварын тархалтыг зогсоох арга хэмжээг боловсруулахын тулд ДЭМБ зэрэг олон улсын байгууллагуудтай хамтран ажиллаж байна. Нэгдсэн Үндэстний Байгууллагын Хөгжлийн Хөтөлбөрийн албан тушаалтан "Энэхүү дэгдэлт нь зөвхөн эрүүл мэндийн асуудал биш, энэ нь Фижи улсын хөгжил, хүний эрхэд заналхийлж буй ноцтой зүйл юм" гэж онцолжээ. Тэд " Эрүүл мэндийн үйлчилгээнээс хэнийг ч хасахгүйн тулд бид ХДХВ-ийн шинжилгээ, эмчилгээний хүртээмжийг өргөжүүлэх ёстой" гэж онцолсон байна. 

Фижи бол дэлхийд алдартай амралтын газар бөгөөд зөвхөн өнгөрсөн жил гэхэд бараг нэг сая зочин хүлээн авсан байна. Австрали зэрэг хөрш зэргэлдээ орнууд иргэддээ Фижи рүү аялахдаа халдвар авах эрсдэлд орж болзошгүй зан үйлээс зайлсхийхийг зөвлөжээ.