ЗӨВЛӨГӨӨ: Үнэртүүлэгчид байнга өртөх нь дам тамихдалтаас ч хортой

Амьсгалын болон дархлааны системд нөлөөлдөг үнэртэй лаа, үнэртүүлэгч гэх мэт зүйлд удаан хугацаагаар өртөх талаар санаа зовж байна

Мэргэжилтнүүд өдөр тутмын амьдралд үнэртүүлэгч болгон байнга хэрэглэдэг анхилуун үнэртэй лаа, агаар цэвэршүүлэгч, үнэртүүлэгч нь хамар, гуурсан хоолойг цочроож, үрэвслийн урвал үүсгэдэг болохыг анхааруулж байна. Ялангуяа удаан хугацаагаар тасалгаан дотор ашиглах нь хортой бодис хуримтлагдахад хүргэж, нарийн тоосны агууламжийг нэмэгдүүлж, тамхи татахтай адил эрүүл мэндэд хор хөнөөл учруулж болзошгүйг онцолжээ.

Солонгосын Асан эмнэлгийн төвийн харшил, дархлаа судлалын тэнхимийн профессор Квон Хёк Су саяхан YouTube сувагтаа, гэртээ хэзээ ч байлгаж болохгүй зүйлсийн нэг болох "үнэртэй зүйлс"-ийг дурджээ. Тэрбээр "Агаар цэвэршүүлэгч, анхилуун үнэртэй лаа, үнэртүүлэгч зэрэг шатаах замаар утаа гаргадаг бүтээгдэхүүнүүд нь бидний биед хортой" гэж тайлбарлаж, "Тамхи шиг органик бодисыг шатаах явцад янз бүрийн хортой химийн бодисууд үүсдэг" гэжээ. Тэрбээр "Хэрэв тасалгаан дотор байлгавал гадаа агаарын бохирдлоос хамаагүй илүү нарийн тоос хөвж чадна" гэж тайлбарлав.

ҮНЭР НЬ ХИМИЙН БОДИС УЧРААС ҮРЭВСЭЛ ҮҮСГЭХ МАГАДЛАЛТАЙ

Диффузор болон агаар цэвэршүүлэгчээс ялгардаг үнэртэн нь голчлон дэгдэмхий органик нэгдлүүдээс (VOC) гаралтай байдаг байна. Эдгээр бодисууд нь агаарт амархан тархаж, хамар, гуурсан хоолойг цочроож, үрэвслийн урвал үүсгэж болзошгүй.

Зарим бүтээгдэхүүнд агуулагддаг фталатыг дотоод шүүрлийн системийг тасалдуулдаг гэж ангилдаг бөгөөд судалгаагаар астма, бронхит зэрэг амьсгалын замын өвчинтэй холбоотой болохыг тогтоожээ. Удаан хугацааны турш өртөх нь дархлааны тогтолцооны үйл ажиллагааг тасалдуулах эсвэл дааврын тэнцвэргүй байдалд хүргэж болзошгүйг үгүйсгэх аргагүй юм.

Түүнчлэн, нимбэг, жүржийн үнэрт ашигладаг лимонен нь өөрөө харьцангуй аюулгүй бодис гэдгээрээ алдартай боловч агаарт эсвэл озонд агуулагдах бусад химийн бодисуудтай урвалд ороход формальдегид зэрэг хортой бодис үүсгэж болзошгүй гэсэн болгоомжлол төрж байна.

ДОТОР АГААР НЬ ГАДНАХ АГААРААС ИЛҮҮ АЮУЛТАЙ

Асуудал нь эдгээр бодисууд дотор хуримтлагддагт оршино. Богино хугацаанд шууд сөрөг нөлөө үзүүлэхгүй байсан ч удаан хугацаанд өртөх нь зөвхөн амьсгалын системд төдийгүй ерөнхий эрүүл мэндэд нөлөөлж болно.

Үнэндээ тавилга өнгөлгөө, будаг, цэвэрлэгээний бодис, хөгц зэрэг янз бүрийн хүчин зүйлсийн нарийн төвөгтэй харилцан үйлчлэлээс болж дотор агаарын бохирдлын түвшин гадаа түвшнээс өндөр байж болохыг харуулсан олон тооны судалгаа байдаг. Энэ үйл явцын үед толуол, фенол, формальдегид зэрэг хортой бодисууд хуримтлагдаж, үрэвслийн хариу урвал, дархлааны тогтолцооны гажигийг өдөөж болзошгүй юм. 

Профессор Квон "Тээврийн хэрэгслийн дотор агаар цэвэршүүлэгч, үнэртүүлэгч хэрэглэхийг багасгах нь зүйтэй" гэж зөвлөсөн бөгөөд "Машины салоны агааржуулагчаар агаарыг эргэлдүүлэх нь хамгийн үр дүнтэй арга юм" гэж зөвлөж байна.