Иран цэргийн ажиллагаагаа зогсооно

Ираны Гадаад хэргийн яам өнөө оройноос эхлэн олон фронтод дайсагнах ажиллагааг нэн даруй, бүрмөсөн зогсоохоор төлөвлөж байгаагаа мэдэгдэв.

Иран Интернэшнл зэрэг гадаадын хэвлэл мэдээллийн хэрэгслүүдийн мэдээлснээр Ираны Гадаад хэргийн дэд сайд Казем Гарибабади "Бид өнөө орой Ливан зэрэг олон фронтод үргэлжилж буй дайн, цэргийн ажиллагааг нэн даруй, бүрмөсөн зогсоохоо зарлана" гэж мэдэгдэв.

АНУ, Иран улсууд эцсийн тохиролцоонд хүрэхийн тулд 60 хоногийн хэлэлцээр хийхээр төлөвлөж байна.

Дэд сайд Гарибабади "Ойлголцооны санамж бичгийн бүрэн эхийг удахгүй гаргана" гэж нэмж хэлэв.

АНУ-ын Ерөнхийлөгч Дональд Трамп TruthSocial-аар дамжуулан "Ирантай хэлэлцээр байгуулагдсан" гэж мэдэгдэж, "Би бүгдэд баяр хүргэе" гэжээ.

Тэрбээр цааш нь "Би Ормузын хоолойг нээхийг албан ёсоор зөвшөөрч, АНУ-ын Тэнгисийн цэргийн хүчний хоригийг нэн даруй цуцлахыг зөвшөөрч байна" гэж мэдэгдээд "Дэлхий даяарх хөлөг онгоцнууд аа, хөдөлгүүрээ асаагаад газрын тосоо ачаад, замдаа гар" гэсэн байна.

Пакистаны зуучлагч Ерөнхий сайд Шебаз Шариф мөн өдөр X (өмнө нь Твиттер)-ээр дамжуулан энхийн хэлэлцээр байгуулагдсаныг зарлаж, "Албан ёсны гарын үсэг зурах ёслолыг энэ сарын 19-нд Швейцарьт зохион байгуулахаар төлөвлөж байна" гэжээ.