Жонатан Хатан хаан Викториягийн эрин үе эхлэхээс өмнө төрсөн

194-өөс дээш настай гэж тооцоолсон яст мэлхий Жонатан дэлхийн хамгийн урт насалсан хуурай газрын амьтан гэдгээрээ хүлээн зөвшөөрөгдөж, Гиннесийн дэлхийн дээд амжилтын бэлгэдэл болгон танилцуулагдсан.

Гиннесийн дэлхийн дээд амжилтын бүртгэлд дурдсанаар, Сейшелийн аварга яст мэлхий Жонатан 1832 оноос өмнө төрсөн гэж тооцоолж байна. Тэрбээр одоогоор энэ дэлхийд оршин тогтнож буй хамгийн урт насалсан хуурай газрын амьтан бөгөөд мөн түүхэн дэх хамгийн урт насалсан яст мэлхий гэж бүртгэгдсэн байна.

Жонатан Хатан хаан Викториягийн эрин үе эхлэхээс өмнө төрсөн бөгөөд Их Британид Тауэр гүүр, Францад Эйфелийн цамхаг барихаас өмнө амьд байсан нь мэдэгдэж байна.

Хэдийгээр тэрбээр хөгшрөлтийн улмаас үнэрлэх мэдрэмжээ алдсан ч ерөнхий эрүүл мэнд нь тогтвортой байгаа аж. Мал эмнэлгийн ажилтнууд түүнийг хоолонд маш их дуртай хэвээр байгааг тайлбарлав. 

Түүний төрсөн оныг яг батлаагүй байгаа ч одоогоор цуглуулсан мэдээлэлд үндэслэн тэрбээр өөрийн төрөл зүйлийн дундаж наслалтыг аль хэдийн давсан байна.

Жонатаныг 1882 онд Британийн нутаг дэвсгэр болох Гэгээн Елена руу шилжүүлсэн бөгөөд тухайн үед түүнийг дор хаяж 50 настай байсан гэж тооцоолж байна. Гэсэн хэдий ч энэ нь албан ёсны бүртгэл биш тул зарим шинжээчид түүний бодит нас одоогийн мэдэгдэж буй тооноос хамаагүй өндөр байж магадгүй гэж үзэж байна. Тэрбээр Сейшелийн аварга яст мэлхийн дундаж наслалтыг аль хэдийн 150 жилээр давсан байна.

Энэ жилийн 4-р сарын 1-ний өдөр Жонатан нас барсан гэсэн цуурхал олон нийтийн мэдээллийн хэрэгслээр хурдацтай тархсан. Жонатанын малын эмч гэж өөрийгөө нэрлэсэн хэрэглэгч X дээр энэ талаар нийтэлсний дараа ташаа мэдээлэл тархсан гэж үзэж байна.

Гэсэн хэдий ч Жонатаныг удаан хугацаанд асарч байсан малын эмч Жо Холлинс эдгээр цуурхлыг үгүйсгэв. Тэрбээр "Жонатан эрүүл чийрэг хэвээр байгаа" гэж нэмж хэлэхдээ "Хэдийгээр тэр үнэрлэх мэдрэмжээ алдаж, нүдний болор цайх өвчний улмаас хараа нь мэдэгдэхүйц муудсан ч хоолны дуршил нь тогтвортой хэвээр байна" гэжээ. Тэрбээр цааш нь "Энэ зөөлөн яст мэлхий хүн зэрэг тоо томшгүй олон хуурай газрын амьтдаас илүү удаан амьдарсан нь гайхалтай" гэж нэмж хэлэв.

Тэрбээр мөн "Түүний одоогийн эрүүл мэнд маш сайн", "Тэр 300 нас хүртэл амьдрах магадлал өндөр байна" гэж таамаглаж байсан. Тэрбээр "Хэрэв түүний бодит нас одоогоор мэдэгдэж байгаагаас өндөр байвал тэр аль хэдийн 300 орчим настай байж магадгүй" гэж тайлбарлав.