ЗӨВЛӨГӨӨ: Өдөрт нэг аяга нэрсний шүүс уух нь хатуурсан цусны судсыг зөөлрүүлдэг

Жил бүр сая сая хүн зүрхний шигдээс, цус харвалт зэрэг зүрх судасны болон тархины судасны өвчнөөр нас бардаг. Эдгээр өвчнийг эмийн тусламжтайгаар зохицуулах боломжтой ч урьдчилан сэргийлэх нь хамгийн сайн арга юм. Саяхан хийсэн судалгаагаар усан үзэм, нэрс нь зүрх судасны эрүүл мэндэд хувь нэмэр оруулж болохыг уг судалгаагаар тогтоожээ.

Судалгааны баг усан үзэм, нэрс эсвэл эдгээр жимсэнд агуулагддаг биологийн идэвхт нэгдлүүдийн хүмүүст үзүүлэх нөлөөг баталгаажуулсан судалгааг эмхэтгэж, хянасан байна. Усан үзэм, нэрс нь флавоноид, полифенол, антоцианин, ресвератрол зэрэг биологийн идэвхт нэгдлүүдээр баялаг гэдгээрээ алдартай. Мөн баг нь цусны даралт, үрэвсэл, эндотелийн эсийн үйл ажиллагаа, артерийн хөшүүн байдал зэрэг зүрх судасны өвчинтэй холбоотой үзүүлэлтүүдийг судалсан байна. Үүний үр дүнд судалгаагаар өдөрт дор хаяж 500 мг усан үзмийн полифенолыг дор хаяж 12 долоо хоногийн турш хэрэглэх нь үрэвслийн түвшинг мэдэгдэхүйц бууруулж, усан үзмийн хэрэглээ нь систолын цусны даралтыг ойролцоогоор 3.17 мм м.у.б-ээр бууруулдаг болохыг баталсан байна.

Нэрсний тухайд судалгаагаар зургаан сарын турш өдөрт 150 гр буюу ойролцоогоор нэг аяга хэрэглэх нь эндотелийн эсийн үйл ажиллагаа, артерийн хөшүүн байдлыг сайжруулдаг болохыг баталжээ.

Судалгааны өгүүлэлд дурдсанаар, энэ нь зүрх судасны өвчний эрсдлийг 12-15% бууруулахад хангалттай өөрчлөлт юм гэжээ.

Судалгааны багийн хянасан судалгаанууд нь олон хүн амд үзүүлэх нөлөөг баталгаажуулж чадаагүй гэсэн хязгаарлалттай бөгөөд оролцогчдын тоо 20-115 хооронд хэлбэлзэж байна. Гэсэн хэдий ч антиоксидант хэрэглээг нэмэгдүүлэхийн тулд хоолны дэглэмдээ нэрс, усан үзэм нэмэх нь сайн сонголт юм. Цусны даралт бууруулах эм зэрэг эмүүдтэй адил өвчний менежментийн үр нөлөөг хүлээх ёсгүй. Цаашилбал, усан үзэм, нэрс хэрэглэж байсан ч дасгал хөдөлгөөн хийх, тамхинаас гарах, холестерины хэмжээг зохицуулах зэрэг зүрх судасны эрүүл мэндэд тустай амьдралын хэв маягийг баримтлах ёстой. Энэхүү судалгааны үр дүнг “Nutrients” сэтгүүлд нийтэлсэн байна.