Dior-ийн олон нийттэй харилцах албаны захирал Mathilde Favier автомашины ослоор амиа алджээ

Францын алдарт загварын ордон Dior-ийн олон нийттэй харилцах захирал Mathilde Favier 57 насандаа автомашины ослоор амиа алдсан харамсалтай хэрэг гарлаа. Түүнтэй хамт кино продюсер, түүний сүйт залуу Nicolas Altmayer 61 насандаа ослоор амиа алдсан байна.

Ослын хэрэг наймдугаар сарын 17-нд Францад гарчээ. Францын хэвлэлүүдийн мэдээлснээр, хосуудын сууж явсан автомашин өөр нэг автомашиныг гүйцэж түрүүлэх үед өөдөөс ирж явсан ачааны машинтай мөргөлдсөн байна. Уг осолтой холбоотойгоор хүний амь насыг санамсар болгоомжгүйгээр хохироосон эсэхийг шалгах мөрдөн шалгах ажиллагаа эхэлжээ.

Dior компани Mathilde Favier-ийн нас барсан талаар мэдэгдэл гаргаж, түүнийг загварын ордны нэр хүндийг олон жилийн туршид тууштай хөдөлмөр, авьяас чадвар, дэгжин байдлаараа бэхжүүлэхэд үнэтэй хувь нэмэр оруулсан онцгой мэргэжилтэн хэмээн дурсан хүндэтгэжээ.

Favier 2011 онд Dior-т ажиллаж эхэлсэн бөгөөд өмнө нь Prada брэндэд ажиллаж байсан аж. Тэрбээр Dior-ийн олон улсын нэр хүндтэй элч төлөөлөгч, үйлчлүүлэгчидтэй ойр ажиллаж, загварын ордны олон нийттэй харилцах үйл ажиллагааг удирдаж байжээ.

Dior-ийн гүйцэтгэх захирал Delphine Arnault түүнийг амьдралд дуртай, өөдрөг, зоригтой, үнэнч найз байсан хэмээн дурссан бол Dior-ийн уран сайхны захирал Jonathan Anderson түүнийг “хамгийн аз жаргалтай, сайхан сэтгэлтэй, өгөөмөр хүн” хэмээн эмгэнэн дурсжээ.

Мөн Dior-ийн толгой компани LVMH-ийн гүйцэтгэх захирал Bernard Arnault түүний олон жилийн хөдөлмөр, авьяас чадварыг өндрөөр үнэлж, ар гэр, хайртай дотнын хүмүүст нь эмгэнэл илэрхийлсэн байна.

Харин Favier-ийн хамтрагч Nicolas Altmayer нь “OSS 117”, “Alpha”, “Monsieur Aznavour” зэрэг Францын кино бүтээлүүдийг продюсерлэсэн гэдгээрээ танигдсан кино урлагийн салбарын уран бүтээлч байжээ.

Mathilde Favier хоёр хүүхэдтэй бөгөөд 2024 онд “Living Beautifully in Paris” нэртэй гэрэл зургийн номоо хэвлүүлж байжээ.

Түүний гэнэтийн нас баралт Францын загвар, кино урлагийн салбарынхныг цочирдуулж, Dior-ийн хамт олон болон ойр дотнын хүмүүс нь эмгэнэл илэрхийлсээр байна.