Н.Булгантамир: “World cleanup Mongolia-6” аянд 12,000 гаруй залуус эх дэлхийгээ цэвэрлэхээр нэгдлээ

НҮБ-ын албан ёсны тэмдэглэлт өдөр болох Дэлхийн цэвэрлэгээний өдөр (World Cleanup Day)-ийг Монгол Улсад зургаа дахь жилдээ зохион байгуулж байна.

Дэлхийн цэвэрлэгээний өдөр нь зөвхөн орчны бохирдлыг цэвэрлэхээс гадна хог хаягдлын зохистой менежмент, ангилан ялгалт, дахин ашиглалт, дахин боловсруулалт, хариуцлагатай хэрэглээний талаарх олон нийтийн мэдлэг, зөв хандлагыг төлөвшүүлэх, иргэдийг байгаль орчноо хамгаалах бодит үйлдэлд нэгтгэх зорилготой дэлхийн хэмжээний арга хэмжээ юм.

Жил бүр мянга мянган залуус энэхүү үйл ажиллагаанд нэгдэж, хог хаягдлыг бууруулах, ангилан ялгах, дахин боловсруулах менежментийн талаарх мэдлэг, туршлага хуримтлуулахын зэрэгцээ эерэг хандлага, зөв дадлыг олон нийтэд түгээн дэлгэрүүлэхэд хувь нэмрээ оруулдаг.

Өнгөрсөн жилийн бүртгэлээр Улаанбаатар хотын хэмжээнд 10,000 залуу тус аянд нэгдэж, орчны хог хаягдлыг ангилан ялгаж, цэвэрлэсэн бол энэ жил буюу “Cleanup Mongolia-6” аяны хүрээнд Монгол Улсын хэмжээнд 12,000 гаруй залуу бүртгүүлээд байна.

Энэ жилийн арга хэмжээ цар хүрээгээ улам тэлж, Монгол Улсын хэмжээнд төрийн болон хувийн хэвшлийн 70 орчим байгууллага хамтран ажиллаж байгаагаараа онцлог юм.

Дэлхийн цэвэрлэгээний өдөр нь гудамж талбай, нийтийн эзэмшлийн болон байгаль орчны бохирдлыг цэвэрлэх үйл ажиллагаагаар хязгаарлагдахгүй. Харин хог хаягдлыг эх үүсвэр дээр нь бууруулах, зөв зохистой хэрэглээг хэвшүүлэх, хог хаягдлыг ангилан ялгах, дахин ашиглах, дахин боловсруулах, улмаар хог хаягдлын зохистой менежментийн талаарх олон нийтийн мэдлэг, ойлголтыг нэмэгдүүлэхэд чиглэдэг.

Энэ хүрээнд иргэн бүрийг хүрээлэн буй орчноо хайрлан хамгаалах, хог хаягдлыг бууруулах, ангилан ялгах, зөв зохистой хэрэглээг хэвшүүлэх, цэвэр цэмцгэр орчныг хамтдаа бүрдүүлэхэд уриалж байна.

Байгаль орчноо хамгаалах нь зөвхөн нэг байгууллага, нэг салбарын үүрэг бус — хүн бүрийн оролцоо, хариуцлагаас эхэлнэ.

Өнөөдөр хийсэн зөв үйлдэл бүр
маргаашийн цэвэр, эрүүл, тогтвортой орчны үндэс болно.

АРГА ХЭМЖЭЭНИЙ МЭДЭЭЛЭЛ

Хаана: Үндэсний цэцэрлэгт хүрээлэн, хөл бөмбөгийн талбай

Хэзээ: 2026 оны 9 дүгээр сарын 19-ний өдөр
Цаг: 09:00

Бүртгүүлэх бол энд дарна уу.