Зөвлөгөө: Чихрийн шижинтэй өвчтөнүүд чихэрлэг жимс идэж болoх уу

Жимс нь амттай бөгөөд ашигтай шим тэжээлээр баялаг тул олон хүн түүнийг таашааж хэрэглэдэг. Гэсэн хэдий ч чихрийн шижинтэй эсвэл чихрийн шижингийн өмнөх үетэй хүмүүс чихэрлэг жимснээс зайлсхийх ёстой гэсэн итгэл үнэмшил байдаг. Энэ үнэхээр үнэн үү?

Сөүлийн Үндэсний Их Сургуулийн Бундан эмнэлгийн Дотоод шүүрлийн эмгэг судлал ба бодисын солилцооны тэнхимийн профессор Мүн Жүн Хо ярилцлагадаа, "Чихрийн шижинтэй хүмүүс чихэрлэг жимснээс зайлсхийх ёстой” гэсэн ойлголт нь буруу юм гэж онцолжээ.

Энэхүү тайлбар нь одоо байгаа судалгааны үр дүнтэй ихээхэн нийцэж байгаа ажээ.

Профессор Мүн томоохон хэмжээний судалгаануудыг иш татан "Зохих хэмжээний жимс хэрэглэх нь 2-р хэлбэрийн чихрийн шижинтэй өвчтөнүүдийн ч цусан дахь сахрын хэмжээг бууруулдаггүй, харин эсрэгээрээ зүрх судасны хүндрэлээс урьдчилан сэргийлэх зэрэг эрүүл мэндийн ерөнхий үзүүлэлтийг сайжруулах нөлөө үзүүлдэг гэжээ.

Солонгосын Их Сургуулийн Ансан эмнэлгийн Гэр бүлийн анагаах ухааны тэнхимийн профессор Ким Хён Жин мөн адил санал бодлоо хуваалцжээ.

Профессор Ким "Бүхэл жимс нь эслэг, витамин, ургамлын гаралтай янз бүрийн шим тэжээлээр хангадаг тул сайн хүнсний эх үүсвэр болж чадна" гээд "Чихрийн шижинтэй эсвэл чихрийн шижингийн өмнөх үетэй хүмүүс жимсийг хэрэглэхгүй байх шаардлагагүй" гэжээ.

Профессор Мүн "Цусан дахь сахрын хэмжээ огцом нэмэгдэхээс урьдчилан сэргийлж нэг дор хэт их идэхгүй байх, нэг порц (ойролцоогоор 100-150 гр) идэж болно гэжээ.

Солонгосын Чихрийн шижингийн Холбоо нь чихрийн шижинтэй өвчтөнүүдэд өдөрт 1-2 удаа, нэг удаагийн хэрэглээ нь ойролцоогоор 50 ккал байхаар жимс идэхийг зөвлөж байна. Нэг удаагийн хэрэглээ нь ихэвчлэн 80 гр алим, 110 гр лийр, 50 гр гадил жимс агуулдаг. Эдгээр санал болгож буй хэрэглээний хэмжээ нь нүүрс усны агууламж болон илчлэгийн түвшинг харгалзан үздэг хүнсний солилцооны хүснэгтэд үндэслэсэн болно.

Гэсэн хэдий ч нүүрс усны агууламж нь жимснээс хамаарч өөр өөр байдаг бөгөөд зохих хэрэглээ нь хувь хүний цусан дахь сахрын хяналтын байдлаас хамааран өөр өөр байж болно. Хэрэв та чихрийн шижин өвчний эмчилгээ хийлгэж байгаа бол өөртөө тохирох хэрэглээг тодорхойлохын тулд эмчтэйгээ зөвлөлдөх нь зүйтэй. Мөн жимсийг хэрхэн хэрэглэх тал дээр анхаарлаа хандуулах шаардлагатай.

Аль болох бүхэл жимс идэх нь хамгийн сайн арга юм. Энэ нь хоолны эслэгийг бүрэн шингээх боломжийг олгодог бөгөөд зажлах үйл явц нь нэг дор их хэмжээгээр хэрэглэхэд хэцүү болгодог.

Нөгөөтээгүүр, шүүс шахаж уух нь хоолны эслэгийн ихээхэн хэсгийг арилгадаг. Бүхэл жимсийг хольж хийсэн ундаа нь зарим эслэгийг хадгалдаг бол жимсний эд нь жижиг хэсгүүдэд задардаг тул их хэмжээгээр хурдан хэрэглэхэд хялбар болгодог бөгөөд энэ нь цусан дахь сахрын хэмжээг зохицуулахад сөргөөр нөлөөлдөг. 100% жимсний шүүс ч мөн адил.

Профессор Ким "Цусан дахь сахрын хариу урвал нь хүн бүрд харилцан адилгүй байдаг тул хоолны дараах цусан дахь сахрын хэмжээг хянахын зэрэгцээ хэмжээг тохируулах нь тустай" гэж тайлбарлав. Тэрбээр "Хэрэв та аль хэдийн чихрийн шижинтэй бөгөөд эмчилгээ хийлгэж байгаа бол одоогийн нөхцөл байдалдаа үндэслэн жимсний зохих хэмжээг тодорхойлохын тулд эмчтэйгээ зөвлөлдөх нь зүйтэй" бөгөөд "Тарвас эсвэл манго зэрэг гликемийн индекс өндөртэй жимсний хэмжээг илүү хатуу хязгаарлахыг зөвлөж байна" гэв.

Сонирхолтой нь, чихэрлэг жимс нь бор будаанаас илүү цусан дахь сахрын хэмжээг нэмэгдүүлдэг гэсэн үг биш юм. Олон улсын гликемийн индексийн мэдээллээр бор будааны дундаж гликемийн индекс 65 байсан нь судалгаанд хамрагдсан жимсний дунджаас 51-ээс өндөр байв. Жимс нь ерөнхийдөө усны агууламж өндөр байдаг тул нэгж жинд ногдох нүүрс усны хэмжээ бор будаанаас бага байх хандлагатай байдаг.

Хоолны дараа жимс идэх нь нэг хоолны нийт нүүрс усны хэрэглээг нэмэгдүүлдэг. Тиймээс хоолны хооронд жимс идэх нь боломжийн сонголт юм. Гэсэн хэдий ч хоолны хооронд жимс идэх нь цусан дахь сахрын хэмжээг зохицуулахад үргэлж илүү ашигтай байдаггүй, учир нь үр дүн нь хоолны найрлага болон хувь хүний цусан дахь сахрын хариу урвалаас хамаарч өөр өөр байдаг.

Чихрийн шижинтэй өвчтөнүүд эсвэл чихрийн шижингийн өмнөх үе шатанд байгаа хүмүүс жимснээс татгалзах шаардлагагүй. Чухал хүчин зүйл бол нэг удаад хэрэглэсэн хэмжээ юм. Боломжтой үедээ шүүсний оронд бүхэл жимс сонгож, цусан дахь сахрын хэмжээгээ тохируулан хэрэглэхийг зөвлөж байна.