Финландад цас их орж, Киттила нисэх онгоцны буудлаас хөөрөх бүх нислэг цуцлагджээ

Финландыг ердийнхөөс илүү хүчтэй хүйтэн давлагаа дайран өнгөрч байгаа тул нислэгүүд ээлж дараалан цуцлагдаж, мянга мянган жуулчид тус улсад гацаж байна.

Ассошиэйтед Пресс агентлагийн мэдээлснээр, Финландын хойд хэсэгт температур -37 хэм хүртэл буурсан хүйтэн давлагаа үүссэн нь Киттила нисэх онгоцны буудлаас хөөрөх бүх нислэгийг цуцлахад хүргэсэн байна.

Цанаар гулгах, туйлын туяа харахаар Лапландад ирсэн мянга мянган жуулчид онгоц битүү мөстөж, мөсийг цэвэрлэх боломжгүйгээс болж ихээхэн хүндрэлтэй байдалд тулгарч байгаа бөгөөд энэ нь нислэгийг зогсооход хүргэсэн байна. Киттила нисэх онгоцны буудал нь өвлийн улиралд Лапланд руу орох гол гарц гэж тооцогддог байна.

Финландын Цаг уурын хүрээлэн 12-нд тус бүс нутагт температур -40 хэм хүрнэ гэж таамаглаж байгаа тул агаарын тээврийн тасалдал түр хугацаанд үргэлжлэх төлөвтэй байна.

Финлянд улс Хойд Европын орнуудын дунд ч хатуу ширүүн өвөлтэй гэдгээрээ алдартай боловч энэ өвлийн хүйтний улирал ердийнхөөс илүү хүчтэй байх төлөвтэй байна. Хүчтэй хүйтэн, их хэмжээний цас орсноос болж Финландад төдийгүй Европ даяар тээврийн тасалдал үүсэж байна.

Германд төрийн өмчит төмөр замын Deutsche Bahn компани их хэмжээний цас орсны улмаас хойд бүс нутагт бүх галт тэрэгний үйлчилгээг зогсоожээ.
Түүнчлэн, Германы эрх баригчид Хойд Рейн-Вестфалийн баруун мужийн замууд мөстөх төлөвтэй байгаа тул 12-нд бүх сургуулиудыг хааж, хичээлүүдийг онлайнаар шилжүүлнэ гэж мэдэгджээ.

Эстони, Литвад эрх баригчид цасан шуурга болох төлөвтэй байгаа тул ард иргэдийг шаардлагагүй тохиолдолд тээврийн хэрэгслүүдээр зорчихгүй байхыг хүссэн бөгөөд Латвийн баруун хэсэгт их хэмжээний цас орох тухай сэрэмжлүүлэг мэдээ гаргасан байна.
 

Эх сурвалж: Ассошиэйтед Пресс агентлаг