Японд гэрлээгүй залуус болзооны аппликейшн ашиглавал 20 мянган иен хүртэлх татаас олгохоор болжээ

Японы Кочи муж гэрлээгүй залуусыг дэмжих зорилгоор болзооны аппликейшн ашиглахад нь 20 мянган иен хүртэлх татаас олгох шинэ хөтөлбөр хэрэгжүүлж эхэлжээ. Уг дэмжлэг нь 20–39 насны ганц бие иргэдэд зориулагдсан бөгөөд зөвхөн гэрлэлтэд чиглэсэн албан ёсны платформд бүртгүүлсэн тохиолдолд олгогдох юм.

Энэхүү татаас нь болзооны аппликейшний жилийн гишүүнчлэлийн төлбөрийн ихэнх хэсгийг төлбөрийг нь төлөх зорилготой бөгөөд хөтөлбөрийн үр дүнг үнэлэхийн тулд оролцогчдоос судалгаа авах аж. Сүүлийн жилүүдэд болзооны аппликейшнүүд Японд түгээмэл болж, 2024 оны судалгаагаар 39-өөс доош насны гэрлэсэн хүмүүсийн дөрөвний нэг нь эхнэр, нөхөртэйгөө онлайнаар танилцсан нь тогтоогдсон байна.

Япон улс төрөлт буурч, хүн амын хөгшрөлт эрчимжиж буй ноцтой сорилттой тулгараад байгаа бөгөөд орон нутгийн захиргаанууд залуусыг гэр бүлтэй болоход дэмжих шинэ арга замуудыг эрэлхийлсээр байна. Тухайлбал, Токио хот хүртэл төрийн дэмжлэгтэй болзооны аппликейшн нэвтрүүлсэн бөгөөд хэрэглэгчид орлогын тодорхойлолт болон гэрлээгүй гэдгээ батлах бичиг баримт бүрдүүлэх шаардлагатай байдаг аж.

Албан ёсны статистикаар, 2024 онд Японд ердөө 705 мянган хүүхэд төрсөн нь түүхэн дэх хамгийн бага үзүүлэлт болж, хүн амын бууралтыг сааруулах шаардлага улам хурцаар тавигдаж байна. Ийм нөхцөлд Кочи мужийн хэрэгжүүлж буй энэхүү санаачилга нь залуучуудыг харилцаа үүсгэж, улмаар гэр бүл зохиоход түлхэц өгөх зорилготой юм.

Гэсэн ч олон нийтийн хандлага харилцан адилгүй хэвээр байна. Зарим иргэд уг бодлогыг дэмжиж байгаа бол нөгөө хэсэг нь санхүүгийн дарамт, урт ажлын цаг, хүүхэд өсгөх өндөр зардал зэрэг суурь асуудлууд шийдэгдэхгүй тохиолдолд үр дүн хязгаарлагдмал гэж үзэж байна.