Киран Купер: "Би тамд очоод эргэж ирсэн юм шиг санагдаж байна"

Ховор тохиолддог элэгний өвчний улмаас хүнд шарлалт өвчнөөр шаналж байсан 20 орчим насны Британи эрийн арьс Симпсоны гэр бүлийнхэн шиг шарлажээ.

Британийн The Sun сонинд энэ сарын 24-ний өдөр мэдээлснээр, Чешир мужийн Нортвич хотод амьдардаг Киран Купер энэ оны эхээр эрүүл мэнд нь эрс муудаж, арьс, нүд нь тод шарласан байна.

Киран цөсний замын атрези буюу ховор тохиолддог төрөлхийн элэгний өвчинтэй ажээ.

Цөсний замын атрези гэдэг нь элэгнээс цөс зөөдөг цөсний суваг зөв хөгжихгүй эсвэл бөглөрч, шарлалт, элэгний хүнд гэмтэл учруулж болзошгүй нөхцөл байдал юм.

Тэрбээр 11 сартай байхдаа нэг удаа элэг шилжүүлэн суулгасан боловч дараа нь хүндрэл үүсэж, 2023 онд хоёр дахь элэг шилжүүлэн суулгах мэс засалд орох хүлээлгийн жагсаалтад орсон байна.

Энэ оны эхээр түүний биеийн байдал улам дордсон тул арьс нь мэдэгдэхүйц шарлаж, эцэст нь эмнэлэгт хүргэгдсэн байна.

Киран "Би Симпсоны дүр шиг харагдаж байсан тул хүмүүс над руу ширтсээр байхад гадуур гарахад эвгүй байсан" гэжээ.

Эмнэлэгт таван долоо хоног эмчлүүлсний дараа тэрбээр хоёрдугаар сарын сүүлээр хоёр дахь удаагаа элэг шилжүүлэн суулгах мэс засалд орсон байна.

Мэс заслын дараа арьсны өнгө нь хэвийн болсон ч тэрбээр маш хүндээр өвдсөн тул дахин алхаж сурах шаардлагатай болжээ.

Одоогийн байдлаар Киран зургаан долоо хоног тутамд эмнэлэгт очиж, амьдралынхаа үлдсэн хугацаанд эм уух ёстой боловч түүний эрүүл мэнд аажмаар сайжирч байгаа гэж мэдээлж байна.

Киеран "Би тамд очоод эргэж ирсэн юм шиг санагдаж байна" гэж хэлээд "Би эдгэрч, амьд байгаадаа талархаж байна" гэв.