dobudobu0
19 настай хятад залуу шөнийн зах дээр шарсан будаа худалдаалж, сард 50 мянган юанийн орлого олдог нь цахим орчинд олны анхаарлыг татжээ. Энэ нь ойролцоогоор 7 мянган ам.доллартой тэнцэх аж.
Овог нь Лу гэх залуу 17 настайгаасаа шарсан будаа худалдаалж эхэлсэн бөгөөд түүнийг бусдаас ялгаруулдаг хамгийн сонирхолтой зүйл нь энгийн гудамжны худалдаачдын адил хувцасладаггүй, харин костюм, зангиа өмсөн, үсээ сайтар янзалж ажилдаа гардаг явдал аж.
Лу үйлчлүүлэгчдэд шарсан будаа бэлтгэн өгөхдөө яг л бизнес уулзалтад оролцох гэж буй мэт албан ёсны хувцастай байдаг нь түүнийг цахим орчинд олны танил болоход нөлөөлжээ.
Гэхдээ түүний бизнес зөвхөн содон төрхөөрөө бус, орлогоороо ч олны анхаарлыг татаж байна. Мэдээллээр, залуу сард дунджаар 50 мянган юанийн орлого олдог бөгөөд үйлчлүүлэгчдийн тоо нэмэгдсээр байгаа аж.
Лугийн аав мөн бизнест нь тусалж, хоолны орц найрлагыг бэлтгэдэг бол Лу өөрөө шарсан будаагаа хийж, үйлчлүүлэгчдэд үйлчилдэг байна.
Ийнхүү ердөө 19 настай Лу гэр бүлийнхээ хамт энгийн шарсан будааны худалдааг амжилттай бизнес болгон хөгжүүлж, костюм, зангиатай шарсан будаа зардаг залуу хэмээн цахим орчинд танигджээ.
Хуваалцах:
Анхаар! Та сэтгэгдэл бичихдээ хууль зүйн болон ёс суртахууныг баримтална уу.
Одоогоор сэтгэгдэл бүртгэгдээгүй байна.
