Владимир Зеленский: Оросын тал халдлагаа зогсоовол Украин эрчим хүчний байгууламжид цохилт өгөхөө зогсооно

Украины Ерөнхийлөгч Владимир Зеленский Оросын тал Украины эрчим хүч болон бусад чухал дэд бүтцэд халдахгүй байх бодит, урт хугацааны амлалт өгч, АНУ уг тохиролцоонд баталгаа гаргавал Украин Оросын эрчим хүчний байгууламжид чиглэсэн цохилтоо зогсоох боломжтой гэж мэдэгдлээ.

Түүний энэ байр суурь АНУ-ын Ерөнхийлөгч Дональд Трамп Орос, Украин хоёр эрчим хүчний байгууламжид харилцан цохилт өгөхөө зогсоохоор тохиролцсон гэж мэдэгдсэний дараа гарчээ. Гэвч тухайн үед хоёр улсын тал ийм тохиролцоог албан ёсоор батлаагүй байна.

Зеленский Оросын тал дайныг зогсоох бодит хүсэл эрмэлзэлтэй гэдгээ урт хугацаанд нотлох шаардлагатай гэж мэдэгдсэн байна. Түүний хэлснээр Москва Украины чухал дэд бүтцэд хийх халдлагаа зогсоох бодит амлалт өгвөл Киев мөн мөргөлдөөнийг намжаах чиглэлд алхам хийхэд бэлэн байна.

Үүний зэрэгцээ НАТО-гийн сөнөөгч онгоц Литвийн агаарын орон зайд нэвтэрсэн дроныг мягмар гарагийн шөнө устгажээ. Литвийн Үндэсний хямралын менежментийн төвийн мэдээлснээр уг дрон Беларусийн талаас орж ирсэн байх магадлалтай бөгөөд Каунас хотын ойролцоох Праткунай тосгоны орчимд устгасан байна. Дроны гарал үүслийг одоогоор эцэслэн тогтоогоогүй байна.

 

Эх сурвалж: Reuters, The Guardian