Adidas брэндийн загварыг дуурайсан хэргээр White Fox-ийг шүүхэд өгчээ

Германы спорт хувцас үйлдвэрлэгч Adidas компани Австралийн White Fox брэндийг дөрвөн судалтай загвар бүхий хувцас худалдаалж, сурталчилсан хэргээр шүүхэд өгчээ. Adidas-ийн үзэж буйгаар, уг загвар нь өөрийнх нь алдарт гурван судалтай зураастай төстэй бөгөөд хэрэглэгчдэд хоёр брэндийг андуурах эрсдэл үүсгэж болзошгүй аж.

Adidas компанийн мэдэгдсэнээр, өнгөрсөн гуравдугаар сараас эхлэн White Fox-д холбогдох хувцасны борлуулалт, сурталчилгааг зогсоох хүсэлтийг удаа дараа тавьсан ч тус компани шаардлагыг биелүүлэхээс татгалзсан байна.

Сидней хотод төвтэй White Fox нь Австрали, Их Британи, АНУ-ын өсвөр насныхан болон залуусын дунд танигдсан онлайн хувцасны брэнд юм. Тус компани нөлөөлөгчид, гудамжны самбар болон автобусны сурталчилгаагаар дамжуулан хэрэглэгчдийн хүрээгээ тэлсээр иржээ.

Австралийн Холбооны шүүхэд гаргасан нэхэмжлэлдээ Adidas компани гурван судалтай загвар нь тус улсад олон жилийн турш тогтсон, үнэ цэнтэй нэр хүндтэй болохыг онцолсон байна. Тус компанийн мэдээлснээр, Adidas нь 1957 оноос хойш Австралид холбогдох худалдааны тэмдгийн эрхээ эзэмшиж иржээ.

Adidas-ийн зүгээс White Fox нь ижил өргөнтэй, зэрэгцээ байрласан дөрвөн судалтай загварыг хувцаснуудад ашиглан худалдаалж байгаа нь барааны тэмдгийн эрхийг зөрчсөн гэж үзэж байна. Мөн эдгээр бүтээгдэхүүн нь Adidas-ийн загвартай ихээхэн адилхан, эсвэл хэрэглэгчдийг төөрөгдүүлэхүйц төстэй хэмээн нэхэмжлэлдээ дурджээ.

Түүнчлэн White Fox-ийн дөрвөн судалтай хувцас болон оймсны сурталчилгаанд Adidas-ийн жинхэнэ бүтээгдэхүүн өмссөн хүмүүсийг дүрсэлсэн гэж тус компани мэдэгдсэн байна. Энэ нь хэрэглэгчдэд White Fox болон Adidas хоорондоо холбоотой, эсвэл Adidas уг загварыг албан ёсоор зөвшөөрсөн гэсэн ойлголт төрүүлж болзошгүй гэж үзжээ.

Adidas шүүхэд гаргасан нотлох баримтууддаа спорт өмд, богино өмд зэрэг бүтээгдэхүүний загваруудыг харьцуулсан зургууд, мөн автобус болон автобусны буудлууд дахь сурталчилгааны зургуудыг багтаасан байна.

Тухайлбал, 2025 оны зургаадугаар сарын онлайн бүтээгдэхүүний жагсаалтад ягаан Adidas гутал өмссөн хүнийг White Fox-ийн оймстой хамт дүрсэлсэн гэж Adidas мэдэгджээ. Мөн шүүхийн баримт бичигт дурдсанаар, хэрэг хянан шийдвэрлэх ажиллагаа эхэлсний дараа тухайн гутал дээрх Adidas-ийн логог дижитал аргаар өөрчилж, эхлээд нэг судлыг, дараа нь гурван судлыг бүгдийг нь арилгасан байжээ.

Adidas компани шүүхээс хохирлоо нөхөн төлүүлэхийн зэрэгцээ White Fox-ийн холбогдох бүтээгдэхүүнээс олсон ашгийг хүү болон шүүхийн зардлын хамт гаргуулахыг хүссэн байна.

Энэ нь Adidas дөрвөн судалтай загварын асуудлаар Австралид хууль зүйн арга хэмжээ авч буй анхны тохиолдол биш юм. Тус компани 2013 онд Pacific Brands компанийг дөрвөн судалтай гутал худалдаалсан хэргээр шүүхэд өгч, нэхэмжлэлдээ амжилттай хүрч байжээ.

Жоржиа, Даниел Контос нарын 2013 онд үүсгэн байгуулсан White Fox нь Даниелийн ээж Мелина Масеригийн оролцоотой хувийн өмчит бизнес юм. Тус брэнд АНУ-ын зах зээлд үйл ажиллагаагаа тэлж, 2024 онд Их Британид нэвтэрчээ.

Australian Financial Review сэтгүүлийн мэдээлснээр, White Fox 2025 оны зургаадугаар сар хүртэлх 12 сарын хугацаанд 542 сая австрали долларын орлого олсон байна. Энэ нь 2022 онд бүртгэгдсэн 121 сая австрали долларын орлогоос дөрөв дахин их үзүүлэлт юм.

Харин Adidas компани 2025 онд 24.8 тэрбум еврогийн орлого олсон бөгөөд гурван судалтай загвар нь дэлхий даяар хамгийн танигдсан брэндийн бэлгэдлүүдийнх нь нэг хэвээр байна.

Одоогоор уг маргааны эцсийн шийдвэр гараагүй бөгөөд White Fox-ийн дөрвөн судалтай загвар Adidas-ийн худалдааны тэмдгийн эрхийг зөрчсөн эсэх, хэрэглэгчдийг төөрөгдүүлэхүйц төстэй эсэхийг шүүх тогтоох юм.