Victoria’s Secret-ийн загварын шоу аравдугаар сарын 18-нд болно

Дэлхийн загварын салбарын хүлээлттэй арга хэмжээнүүдийн нэг болох Victoria’s Secret Fashion Show 2026 аравдугаар сарын 18-ны ням гарагт АНУ-ын Калифорни мужийн Кулвер-Сити дэх Sony Pictures Studios-т зохион байгуулагдана. Энэ жилийн шоу Лос Анжелес хотоос шууд дамжуулагдах бөгөөд загварын тайзнаа алдартай супермоделиуд болон олон улсын хөгжмийн одод нэг дор цуглах юм. 

Арга хэмжээ АНУ-ын Номхон далайн цагаар 16:30, зүүн эргийн цагаар 19:30 цагт эхэлнэ. Монголын цагаар аравдугаар сарын 19-ний Даваа гарагийн өглөөний 07:30 цагт шууд үзэх боломжтой. Шоуг Victoria’s Secret-ийн албан ёсны YouTube сувгаас үнэ төлбөргүй үзэхээс гадна брэндийн Instagram болон TikTok хуудсаар шууд дамжуулах аж. Үндсэн шоуны дараа Номхон далайн цагаар 17:45, зүүн эргийн цагаар 20:45 цагаас онцлох мөчүүдийг эргэн дурсах, загварын цуглуулгатай танилцах тусгай хөтөлбөр үргэлжилнэ. 

Энэ жилийн хөгжмийн хөтөлбөрт дөрвөн эмэгтэй уран бүтээлч, хамтлаг оролцохоор болжээ. Тодруулбал, Грэммийн шагналт реппер Megan Thee Stallion, поп дуучин Tate McRae, кантри хөгжмийн төлөөлөгч Megan Moroney болон олон улсын охидын KATSEYE хамтлаг тайзнаа амьд тоглолт үзүүлнэ. Ийнхүү загварын шоу хөгжмийн томоохон тоглолтуудтай хосолж, загвар, энтертайнментын үзэгчдийг нэгтгэхээр байна. 

Загварын тайзнаа Adriana Lima, Candice Swanepoel, Elsa Hosk, Gigi Hadid, Joan Smalls, Imaan Hammam, Liu Wen, Grace Elizabeth зэрэг олны танил моделиуд оролцохоор зарлагджээ. Мөн Paloma Elsesser, Alex Consani, Abby Champion, Ashley Graham, Anok Yai, Precious Lee нарын моделиуд тайзнаа алхах бүрэлдэхүүнд багтаж байна. Зохион байгуулагчид оролцогчдын жагсаалтыг албан ёсны хуудсаараа дамжуулан шинэчилж байгаа тул нэмэлт нэрс зарлагдах боломжтой. 

Энэ жилийн шоуны онцлох үйл явдлын нэг нь брэндийн шинэ сахиусан тэнгэр буюу Victoria’s Secret-ийн шинэ гэрээт моделио тодруулах явдал юм. “Angels Among Us” нэртэй YouTube баримтат цувралаар шинэ сахиусан тэнгэр болохын төлөө өрсөлдөж буй моделиудын сонгон шалгаруулалт, бэлтгэл, тайзны арын үйл явцыг харуулж байгаа бөгөөд ялагчийг аравдугаар сарын 18-ны загварын шоуны үеэр зарлахаар төлөвлөжээ. Ялагч нь IMG Models агентлагтай гэрээ байгуулах боломжтой юм. 

Мөн энэ удаа үзэгчдийг арга хэмжээнд илүү өргөн оролцуулах зорилгоор АНУ-ын сонгогдсон AMC кино театруудад шоуг шууд дамжуулах аж. Ингэснээр загварын шоуг зөвхөн цахим орчноос бус, том дэлгэцээр үзэх боломж бүрдэж байна. 

Victoria’s Secret Fashion Show нь далавчтай гоёмсог хувцас, сүрлэг тайз засал, алдартай моделиудын оролцоогоороо дэлхий даяар танигдсан арга хэмжээ юм. 2026 оны шоу Лос Анжелес хотод зохион байгуулагдаж, загварын тайз, амьд хөгжмийн тоглолт болон шинэ моделиудыг тодруулах үйл явцыг нэгтгэснээрээ энэ жилийн загварын салбарын анхаарал татсан үйл явдлуудын нэг болохоор байна.